Filmiliortartoq unnerluutigineqartoq
Qaanaami angajoqqaaqatigiit filmiliortartoq kommunillu isumaginninnermut pisortaa politiinut unnerluutigaat, qaammatini pingasuni Qaanaami isiginnaartitseqatigiinnik suliniuteqarnerminni meeqqat pisinnaatitaaffiinik unioqqutitsisimasutut. Taama tusarliivoq KNR.
Isiginnaagassianik ilitsersuisumut maalaarutit arlalissuit ilagaat filmiliortartup angajoqqaat akuersiteqqaarnagit, meeqqat apersorsimammagit angajoqqaaminnut qanoq pissuteqarnerat pillugu, tamaasalu videoliaralugit.
- Kikkut angajoqqaavi ippassaq aalakoorpat? Kikkunnilu nerisassaqanngila? tassa apeqqutit ilaat meeqqat akisassaat, politiinut unnerluutiginnissummi allassimavoq.
Angajoqqaallu naapertorlugit meeqqat apeqqutinut akuersaartut tamatuma kingorna inimut kisimiitillugit isertinneqartarput, oqalutsilerlutik kommunip isumaginninnermut pisortaanik oqaloqatigineqartarlutik.
- Tamanna peqatigalugu oqarfigineqartarsimapput qanoq pisoqarneranik angajoqqaatik oqaluttuutissanngikkaat, angajoqqaat paasissut issiipput.
Filmiliortartoq isumaginninnermullu pisortaq aamma unnerluutigineqarput meeqqat, angajoqqaat inuillu ataasiakkaat ataqqinassusaannik innarliisimasutut.
Angajoqqaat tikkuarpaat suliniut meeqqat tarninginik ajoqusiisimasoq.
- Qitornavut filmiliortartumik oqaloqateqareernermik kingorna ima tarnimikkut artukkerneqarsimaigaat, ilaat iloqqutsisalerlutik. Meeqqat angajoqqaaminnut pitsaasumik qanittumillu attaveqaraluartut angajoqqaaminnit ungasillipput, KNR malillugu politiinut unnerluussummi allassimavoq.