Aalisarneq
Finn Karlsen pakatsilluni: Qaleralinnut siunnersuut nukinngunneqarpoq
Avannaani qalerallit pillugit aqutsiveqarfiit killeqarfiit allangortinneqartussanngorput
Aalisarnermut, piniarnermut nunalerinermullu naalakkersuisoq Finn Karlsen Siumumeersoq isumaqarpoq avannaani qaleraleqarfinni aqutsiveqarfiit allanngortinnissaannik siunnersuut Inatsisartuni amerlanerussuteqartut nukinnguppallaaraat. Inatsisartut marlunngornermi oqallinneranni Finn Karlsen taama nalunaaruteqarpoq.
Atuaruk: Qaleralinniarnermi killeqarfiit Naalakkersuisut allanngortilersaarpaat
Siumut sinnerlugu Inatsisartunut ilaasortaq Karl-Kristian Kruse siunnersuuteqartuuvoq Upernavimmi, Uummannami Qeqertarsuullu tunuani qaleralinnik aqutsiveqarfiit killeqarfiisa allanngortinneqarnissaannik. Siunnersuut, Siumup, Atassutip, Partii Inuit aamma Partii Naleqqap ilalerpaat.
Inuit Ataqatigiit Finn taperserpaat
Siunnersuummut allannguutissatut siunnersuut Naalakkersuisut saqqummiukkaluarpaat tassaani siunersuutigalugu allannguinissaq susassaqartut suleqatigalugit suliarineqassasoq. Allannguutissatulli siunnersuut amerlanerussuteqartunit ilalerneqanngilaq.
- Neriuutigisimagaluarpara allannguutissat peqqissaartumik atuisut aalisartut suleqatigalugit suliarineqassasut. Siunnersuuteqartoq Karl-Kristian Kruse aalisartuuvoq aamma taassuma aalisartutut piginnaasai apeqqusinngilluinnarpakka. Kissaatigisimagaluarigaana allannguutissap aalisartut suleqatigeqqinnaarlugit ilusilersornissaa pissasoq, Finn Karlsen pakatsisimarpalulluni oqallinnermi oqarpoq.
Siunnersuummi pineqarpoq Upernavimmi, Uummannami Qeqertarsuullu tunuani sumiiffiit ilaanni pisat pisassanut ilanngaataasarunnaassasut.
Inuit Ataqatigii Demokraatillu Naalakkersuisut allannguutissatut siunnersuutaat ilaleraluarpaat.
- Amerlanerussuteqartut isumat tusaatissatut tigusariaqarpara, Finn Karlsen oqarpoq.
Siunnersuut junip pingajuani aappassaanneerneqassaaq.