Finn Karlsenip suliffissaaleqisut marloriaammik amerlanerunerarai
Oqaluuserisassamut tamat isumaqataaffigisaannut Inatsisartunit nalunaaquttap-akunneri pingajuat affaq atorneqarput
– Oqaluuserisassamiiginnariarta, ataatsimiinnermut aqutsisut marluk Josef Motzfeldt aamma Justus Hansen arlaleriaqalutik oqarput, iluaqutaanngitsumilli.
2011-imut ilassutitut aningaasaliissutissanut inatsit partiinit tamanit akuersaarneqartoq pillugu oqallinneq nalunaaquttap-akunnerinik marlunnik affarmillu sivisussuseqalerpoq, tamatumanilu ullormut oqaluuserisassaq pivallaarnagu kisitsisit pasilliutillu saqqummiunneqaqattaarlutik.
2011-mut Inatsimmi ingerlatsinermi, sanaartukkani taarsigassarsiarititanilu 200,3 millioner koruuninik amigartoortoqarpoq, kisiannili ilassutitut aningaasaliissutit arfinillit 189,6 millioner koruuninik aningaasartallit ukiup ingerlanerani Aningaasaqarnermut Akileraartarnermullu Ataatsimiititaliamit akuersissutigineqarsimammata amigartoorutaasussatut missingersuutigineqartut 389,9 millioner koruuninut qaffariarsimallutik.
Læs også: "Øget underskud i 2011"
Ataatsimiititaliamit isumaqatigiissumit Inuit Ataqatigiinnit, Demokraatinit, Siumumit Atassummillu ilaasortaaffigineqartumit aningaasaliissutit amerlanersaat akuersaarlugit taasissutigineqartarsimapput, ilaatigut aningaasaliissutit annersaat atuartut angerlarsimaffiannut ilinniartullu ineqarfiinut 141 millioner koruunit, taamaattumillu isoriniagassaqarani.
Akerlianik oqaluuserisassaq suliffissaaleqineq pillugu akaareqatigiiffiunngilluinnartumik oqaluuserinniffiulerpoq.
Niaqorsorneq
2011-mi suliffissaaleqisut naatsorsorneqarnerat Naatsorsueqqissaartarfimmit saqqummiunneqaqqammerpoq:
Illoqarfinni qaammammut inuit agguaqatigiissillugit 2.793-it suliffissaaleqinermit kalluarneqarsimasarput, suliffissaaleqisullu sulisinnaasut 8,8 procentiinik amerlassuseqarlutik. (2010-mi inuit 2.411-t imaluunniit sulisinnaasut 7,6 procentii suliffissaaleqinermit eqqugaapput).
Kisitsisitigulli paasissutissat taakku Siumumeersup Finn Karlsenip isumaqatiginngilai: - Niaqorsulaarnikkut suliffissaaleqisut 15 procentit sinnerlugit amerlassuseqarnerat ajornanngitsuaqqamik takuneqarsinnaavoq.
Siumullu siulittaasua Aleqa Hammond ilassuteqarpoq: - Suliffissaaleqisut naalakkersuisooqatigiit maanna atuuttut nalaannisut qaffasitsiginngisaannarsimapput.
Oqaatigineqartut taakku marluk aningaasaqarnermut naalakkersuisup Maliina Abelsenip, Inuit Ataqatigiit, Naatsorsueqqissaartarfik innersuussutigalugu ilumuunnginnerarpai, taarsiullugulu Aningaasaqarnermut Akileraartarnermullu Ataatsimiititaliaq kaammattorlugu ukiunut arlalissuarnut suliffissaaleqisunik kisitsisitigut paasissutissanik piniaqqullugu salluliuutit ilumoortullu Inatsisartunit naalakkersuisunillu paasineqarsinnaaqqullugit.
Maliina Abelsenip niaqorsornermut suliffissaaleqisunillu kisitsisitigut paasissutissat kisitsisitaasa pinnguarineqarnerinut taarsiullugu suliffissaaleqinerup akiorniarnerani peqatigiinnissaq kaammattuutigaa, kisianni nal. ak. 2,5-ini oqalukkaluarmat tusaaneqanngilaq.