Fogh: Nunat EU-mi ilaasortat silaannaap allanngoriartorneranut anguniakkatik sakkortusinngikkaluarunikkit ajunngilaq
Qallunaat statsministeriat iluarisimaarinnilluni EU-mi nunat assigiinngitsut naalakkersuisuisa siulittaasuisa Bruxellesimi ataatsimeereernerannit naliliivoq
Naak nunat EU-mi ilaasortat silaannaap allanngoriartorneranut tunngatillugu anguniakkatik pioreersut uteqqiinnaraluaraat, tamatumunnga tunngatillugu Anders Fogh Rasmussen isumaqarpoq ajugaanerusoq. Minnerunngitsumik nunat arlallit aappaagu isumaqatigiissuteqarnissamut tunngatillugu piffissaq pilersaarutaasoq innarlerniarlugu siorasaarutigisimammassuk.
- Naggataani angusarineqartoq uanga isiginiarpara, tamannalu naammagisimaarpara. Taassuma angunissaanut akornanni pisimasut pilertortumik puigorneqassapput, Fogh oqarpoq.
Tamatumunnga taarsiullugu silaannaap allanngoriartorneranut ernumassuteqartut neriorsorneqarput, silaannaap allanngoriartorneranut iliuusissatut pilersaarutit isumaqatigiissutigalugit taasissutigineqarumaartut. Taamaalillutik periarfissaqalissapput aammaarlutik naaggaarnissaminnut qunusaarinissaminnut, nunat EU-mi ilaasortaasut naalakkersuisuisa siulittaasuisa decembarimi Bruxellesimi ataatsimeeqqinnissaanni.
- Isertorneqartariaqanngilaq decembarip tungaanut suli ajornakusoortorujussuarnik isumaqatigiinniarnernik ingerlatsinissarput, Anders Fogh Rasmussen oqarpoq.