Folketingi: Naalagaaffeqatigiinneq pillugu oqallinneq allarluinnarmut sangusoq
Naalagaaffeqatigiinneq pillugu nassuiaat Folketingimi ukiumoortumik ullumi oqaluuserineqarpoq. Oqallinnerli sammisanut, soorlu suleqatigiinnermut, sillimaniarnermut politikkimut, nunattalu tunngaviusumik inatsisissatut siunnersuutaanut tunngasinnaagaluartoq, taamaattoq politikerit ataasiakkaat iliuuserisaat oqallinnermi initunerulerput.
Statsminister Mette Frederiksenip Naalagaaffeqatigiinneq pillugu nassuiaataa Folketingimi ullumi tallimanngornermi oqaluuserineqarpoq.
Oqallinnissaq sioqqullugu SF-imi nunarput pillugu oqaaseqartartoq Karsten Hønge politiken.dk-mit apersorneqarami oqarpoq Naalagaaffeqatigiit iluanni nunat pingasuusut suleqatigiinneq qanoq ittoq Naalagaaffeqatigiinnermi attaveqatigiinneq qanoq ittoq eqqarsaatigisariaqaleraat.
Folketingimili oqallinneq suleqatigiinnissamut, sillimaniarnermut politikkimut, aalisarnermut isumaqatigiissutinut isumaginninnermiluunniit unammilligassanut tunnganani, allatorluinnaq ingerlanneqarpoq.
DF-ip nunarput pillugu oqaaseqartartuanit, nunatsinni partiimi siulittaasoq Naalakkersuisuusimasorlu ammip qalapaa aallaavigalugu immikkoortitsisutut taaneqarpoq:
- Kalaallit Nunaanni tunngaviusumik inatsissatut siunnersuummi kalaallit inunnik taaneqarput. Taavami Kalaallit Nunaanni inunngorsimasut qallunaanilli angajoqqaaqartut? Imaluunniit kingoqqisuunerminni akutaasut? Taakku piiarneqassappat imaluunniit inuiaqatigiinni minnerpaatut isigineqassappat? Soorlu ammip qalipaataanik immikkoortitsisup Pele Brobergip siunnersuutigisimasaatut, Alex Ahrendtsen (DF) oqaaseqarnermini aperivoq.
Naleqqami siulittaasup, Pele Broberg taama oqaaseqaatigineqarnini Facebookimi oqaasertalerpaa, erseqqissarlugulu partiip namminiilivinnissamik suliniuteqarnera eqqortuusoq uppernarseqqiinnarlugu.
Kalaallit oqaaseqarlunilu akisartoq
Naalagaaffeqatigiinneq pillugu oqallinnermi sammisaq aamma allamut sangulluinnarpoq nunarput sinnerlugu folketingimi ilaasortaq Aki-Matilda Høegh-Dam oqaluttarfimmut qaqimmat. Taannami kalaallisut oqalugiarpoq, qallunaatullu aperineqartilluni, imaluunniit Folketingimi siulittaasumit oqarfigineqartilluni, kalaallisut akisarluni.
Oqaaseqareernermini Aki-Matilda Høegh-Dam folketingimi ilaasortaqatiminut qallunaajusunut aperineqartilluni kalaallisut akisarmat, oqaaseqartartut ilaasa aperissallugu unitsiinnarpaat:
- Kalaallit Nunaanni nutaarsiassaqartitsivinnit taamaallaat sammineqartussami isiginnaartitseqataasutut inissisimanianngilanga, SF-imi nunarput pillugu oqaaseqartartoq Karsten Hønge oqarpoq. Taassuma ilanngullugu erseqqissarpaa Aki-Matilda Høegh-Dam Danmarkimi inunngorsimasoq danskisullu aamma oqaaseqartuusoq.
Naalakkersuisoqarnikkut suleqatigiilluartut
Statsminister Mette Frederiksen (soc.) naggasiilluni oqaaseqarnermini nunatsinni tunngaviusumik inatsimmik suliaqartoqarnera annikitsuinnarmik taavaa.
- Ima paasivara Kalaallit Nunaanni tunngaviusumik inatsisissamik siunnersuuteqartoqarnera oqallisigineqarusuttoq. Kalaallit oqallinnissamik kissaateqarpata, taava naalakkersuisuniit ataqqillugu akulerutissanngilagut, taamallu aamma siunertaqarpugut, Mette Frederiksen oqarpoq.
Statsministerip Aki-Matildap oqaaseqarnera Folketingimilu ilaasortaqatiminut paasineqarsinnaanani oqalunnera oqaasertalinngilaa.
Taassumalli erseqqissarpaa folketingimi nunat avannarliit killiillu naalakkersuisui suleqatigiinnerat suli pitsaasuusoq. Neriuutiginerarlugulu inuiaqatigiinni unammillernartoqarpat aamma aaqqiissutissanik nassaartoqarumaartoq.