Folketingi: Statsministerip oqalugiaataa kalaallisut savalimmiormiutullu
Ilaasa Aki-Matilda Høegh-Dam (S)-ip folketingimi kalaallisut oqalugiarnera tusaaqqusaarnertut nalilerpaat, taamaattorli taanna aallaavigalugu folketingip siulittaasoqarfiata aalajangerpaa suliat ukiut tamaasa utertartut naalagaaffeqatigiinnermut tunngasut tamarmik kalaallisut savalimmiormiutullu nutserneqartalissasut.
Folketingimi ilaasortaq Aki-Matilda Høegh-Dam (S) oqallinnerujussuarmik aallartitsivoq folketingimi oqaatsit suut atorneqassanersut, tamanna pivoq oqaluttarfimmiit kalaallisut oqalugiareersorlu.
Aallaqqaammut oqallinnerujussuarmik pilersitsivoq folketingip oqaluttarfianit oqaatsit sorliit atorneqassanersut kiffaanngissuseqartitsisoqassanersoq, ilaasa akuerigaat ilaasalu akerlerigaat. Maannali folketingip siulittaasoqarfiani nalilersuereerlutik aalajangerput suliat naalagaaffeqatigiinnermut nunanut taakkununnga pingasunut tunngasut tamarmik nutserneqartalissasut.
Folketingimi attaveqaqatigiinneq pitsaanerusoq oqaatsit pingasut atorlugit
- Folketingip siulittaasoqarfiani amerlanerussuteqartut aalajangiuppaat Kalaallit Nunaat aamma Savalimmiut sinnerlugit folketingimi qinikkat oqaatsitigut naapigiarniarlugit, tamannalu sulinermi piviusorsiortutut naliliineq tunngavigalugu aaqqiivigineqarpoq. Ilutigisaanik folketingimi attaveqaqatigiinneq pitsanngorsarniarlugu kalaallisut savalimmiormiutullu oqaatsit atorneqarnerinut tunngatillugu iliuuseqarpugut, taamaalillutik aamma atlantikup avannaani innuttaasut politikkikkut oqallinnerni aammalu inatsisiliornermi malinnaanissaminnut periarfissarinnerulernissaat siunertaralugu iliuuseqarpugut, folketingip siulittaasoqarfiani siulittaasoq Søren Gade oqarpoq.
- Nutserisoqarnikkut aaqqissuussinerup malitsigisaanik siullertut Kalaallit Nunaat aamma Savalimmiut sinnerlugit qinikkat oqaatsiminnik atuisinnaapput aamma namminneq oqaatsitik atorlugit oqaaseqarsimatillugit piffissamik sivisunerusumik tunineqartassapput danskisut namminneq nutserisinnaaqqullugit.
- Tamatuma saniatigut nassuiaatit ilaallu ilanngullugit allagaatinngorlugit saqqummertut oqallinnernut ukiut tamaasa utertartunut, aammalu pissutsinut kalaallinut savalimmiormiunullu tunngassuteqartunut naqitanngorlugit saqqummiussat tamarmik oqaatsinut pineqartunut nutserneqartalissapput. Ilaatigut tamanna atuuppoq ammaanermi oqallinnermi saqqummiunneqartut aammalu Naalagaaffeqatigiinneq Issittorlu pillugit ukiut tamaasa nassuiaataasartut matumani pineqarput.
Taamaalilluni Statsminister Mette Frederiksen-ip ammaalluni oqalugiaataa 2023-mut tunngasoq savalimmiormiutut kalaallisullu pissarsiarineqarsinnaalerpoq.
Statsministerip oqalugiaataata kalaallisut nutserneqarnera UANI atuarsinnaavat.