Folketingimi ilaasortat: Danskit naalakkersuisui akisussaaffimmik tigusinerat qujanarpoq
Kalaallit meerartaat misileraatitut atorneqarsimasut taarsiiffigineqartussanngornerat folketingimi ilaasortanit Aki-Matilda Høegh-Damimit aamma Aaja Chemnitz Larsenimit nuannaarutigineqarpoq.
’Meeqqanut misileraatigineqarsimasunut’ suli inuusunut arfinilinnut Naalagaaffik eqqartuussivikkut isumaqatigiissuteqarpoq, taamaasilluni Naalagaaffik 250.000 koruuninik taarsiissuteqartoqartussanngormat.
Nutaarsiassaq folketingimi ilaasortanit Aki-Matilda Høegh-Damimit Aaja Chemnitz Larsenimiillu nuannaarutigineqarpoq.
- Nuannaarutigaara meeraanerminni misileraataasimasut taarsiiffigineqarmata. Neriuppunga kissaatimik ilaat piviusunngortissinnaanngoraat soorlu ataatsip qimagutinnginnermini nunarput takoqqikkusukkaa. Pineqartut ilaqutailu nunatsinnut uummammik pisumik tikilluaqqussavagut, Aki-Matilda Høegh-Dam tusagassiutinut nalunaarummi oqarpoq.
Akuerineqartut
Aaja Chemnitz Larsenip meeqqat misileraataasimasut taarsiiffigineqartussanngornerat aamma nuannaarutigaa.
- Suliaq inuttut politikkikkullu qanimut malinnaaffiginikuuara. Siullermik statsministerip taarsiiffiginninnissamik itigartitsimmat pakatseqqaarnikuuvunga, suliarlu imaannaannginnissaa ernumaginikkuullugu, oqarpoq.
Meeqqat misileraataasimasut 2020-mi pisortatigoortumik Mette Frederiksenimit utoqqatserfigineqarput. 2021-mi taarsiiffigineqarnissamik qinnuteqaataat itigartinneqarluni. Isumaqatigiissuteqartoqareersoq maanna pineqartut taarsiiffigineqartussanngorput.
Akisussaaffimmik tigusineq
- Isumaqatigiissuteqartoqapallannissaa naatsorsuutigisimagaluarpara, taamaattumik suliap suliarineqarnera sivisuallaannginnera nuannaarutigaara. Neriuppunga pineqartut eqqissillutik ingerlariaqqissinnaalissasut, IA-mi politikeri oqarpoq, nangillunilu:
- Danskit naalakkersuisuisa utoqqatsernerat akisussaaffimmik tigusinerattut isigaara, maannalu taarsiinerat inatsisilerinikkut akisussaaffimmik tigusinertut isigaara. Danskit naalakkersuisui akisussaaffinnik taamatut tigusinerat nuannaarutigaara, soorlu Godhavnip meerartai taama pineqarsimasut.