Folketingimi ilaasortat isumaginninnermi ministeri kimigiiserfigigaat
Aaja Chemnitz Larsen aamma Aki-Matilda Høegh-Dam isumaqarput, kalaallit angajoqqaat pinngitsaaliissummik arsaarinnissuteqartoqarniaraangat angajoqqaatut piginnaaasaannik misissuiffigineqartarneranni pissutsit akuersaarneqarsinnaanngitsut.
Kalaallit angajoqqaat pinngitsaaliissumik arsaarinnissuteqartoqarniaraangat angajoqqaatut piginnaasaannik nalilersuisoqartarnerani pissutsit akuersaarneqarsinnaanngillat.
Folketingimi ilaasortaq Aki-Matilda Høegh-Dam P1 Morgen-imi apersorneqarami taamatut oqarpoq.
P1-imit angajoqqaat kalaaliusut danskiusutut angajoqqaatut piginnaasaannik nalilersuiffigineqartarnerat sammineqarpoq, nalilersuisarneq Danmarkimi pissutsinut ileqquusunullu naleqqussagaangaluartorluunniit. Taamaalillutik angajoqqaanit danskiusunit ajornerusumik inissinneqartarput, nalilersuinermi immikkut inuiaassuseqarneq kulturikkullu assiginngissuteqarneq eqqarsaatigineqarneq ajormat, pineqartumut atatillugu ilisimasalik isumaqarpoq.
- Taamatut nipeqartillugu akuersaarneqarsinnaanngilluinnarpoq. Pissutsit pinngitsaaliissummik arsaarinnissuteqarnissamut tunngaviusut naleqquttuusussaapput. Inuiaqatigiinni inuit inatsisitigut illersugaaffianni inuuvugut. Taamaammat inatsisitigut innarlitsaalisaaneq pitsaanerpaajusariaqarpoq. Tusakkakka malillugit, matumani inatsisitigut innarlitsaalisaaneq ptsaanerpaajunngilaq, Aki-Matilda Høegh-Dam oqarpoq.
Naleqqussaasoqartariaqartoq
Aaja Chemnitz Larsen aamma isumaqarpoq, pissutsit taamatut ittut akuersaarneqarsinnaanngitsut.
Folketingimi ilaasortat taakku marluullutik Danmarkimi kalaallit meerartaasa angerlarsimaffiup avataanut nissinneqartarnerannik VIVE-p nalunaarusiaa Folketingimi tusarniaassutigineqarneranut peqataassapput. Nalunaarusiaq maajip 24-an saqqummiunneqassaaq, tusarniaanerli maajip 25-ani ingerlanneqassalluni.
Danmarkimi kalaallit angajoqqaat danskinut sanilliullutik arfineq-marloriaammik meeqqaminnik arsaagaasarput.
Aki-Matilda Høegh-Damip P1 Morgen-imut oqaatigaa, isumaginninnermi ministeri Astrid Krag arlaleriarluni oqaloqatigisarsimallugu.
Kalaallit Folketingimi ilaasortat politikkikkut kimigiisertut
Aaja Chemnitz Larsen aamma isumaqarpoq, kalaallit angajoqqaat meeqqaminnik paarsisinnaaerannik misissueriaaseq aaqqiiffigineqartariaqartoq. Misissuisarnerup naleqqussarneqarnissaa sulissutiginiarpaa, kalaallinik angajoqqaanik nalilersuisarnermi kulturikkut assigiinngissuteqarneq tunuliaqutaasullu nalilersuinermut ilanngunneqartalernissaat anguniarlugu.
- Pinngitsoorani naleqqussaasoqartariaqarpoq, kalaallit angajoqqaat nalilersorneqarneranni tunuliaqutaasa kulturiatalu pingaartinneqarnissaat qulakkeerniarlugu. Aamma isumaqarpunga, misissuisoqarnerani ilinniarsimasumik oqalutseqartoqartarnissaa pisariaqartinneqartoq, aamma kulturimut atatillugu nassuiaasinnaasumik, tassa angajoqqaatut piginnaasaasa nalilersorneqarneranni kulturikkut tunngaviat ilanngunneqartarniassammat, Aaja Chemnitz Larsen oqarpoq.
Aki-Matildap politikkikkut kimigiisernini ingerlatiinnarniarpaa, isumaginninnermilu ministeri sammisaq pillugu isumasioqatigineqarnissaa sulissutiginiarlugu. Kalaallit angajoqqaat nalilersorneqarneranni periuserineqartartoq isorivaa, partiillu talerperliunerusut suleqatigalugit isumaginninnermi ministerip misissuisarnermut isumaa pillugu apersorniarlugu aamma suliap ingerlateqqinneqarnissaanut qanoq siunertaqarnersoq paasiniarlugu.