Folketingimi najuuttannginnerujussuaq
Atlantikup avannaaniit ilaasortaatitat taasisinnaatitaasut Folketingimi taasinerit 98 procentiinut peqataaneq ajorput, Politiken allappoq.
Folketingimi taasisoqassatillugu peqataasannginneq annertoqaaq kalaallillu ilaasortaatitaat Lars-Emil Johansen, Siumut, aamma Juliane Henningsen, Inuit Ataqatigiit, taasisoqartillugu peqataanikinnerpaanut ilaapput. Taakku taasinerit 98 procentiini taaseqataasarsimanngillat, Politiken allappoq.
Kisianni kalaallit ilaasortaatitaat suliat Kalaallit Nunaannut attuumassuteqartut pineqartillugit taaseqataasarput.
– Suliaq Kalaallit Nunaannut soqutiginaateqaraangat folketingip ataatsimiittarfianni taasinernut taamaallaat peqataasarpunga. Tamanna isumaqatigiissutiginikuuarput. Uanga folketingip ataatsimiittarfianiittaqaanga, Juliane Henningsen Politikenimut oqarpoq.
Lars-Emil Johansen KNR-imut nassuiaavoq, nammineq partiinik naalakkersuisooqatigiinnik taasisarnerit pillugit isumaqatigiissuteqarluni, imaappoq, naalakkersuisooqatigiinni ilaasortaasut ilaat kalaallit ilaasortaatitaat taasisoqartillugu najuutinngikkaangata taaseqataaneq ajorput. Aamma kalaallit ilaasortaatitaat suliat qallunaat nunaannuinnaq tunngasut taasissutigineqassatillugit taaseqataaneq ajorput.
– Folketingimi sulineq taasinerinnaanngilaq. Ataatsimiitsitaliani arlalinni ataatsimiittarpugut, Lars-Emil Johansen oqarpoq.
Statsminister Anders Fogh Rasmussen aamma taasisoqartillugu amerlasoorpassuarni taaseqataaneq ajorpoq. Taasinerit 96 procentiini taaseqataaneq ajorpoq.