Folketingimut qinersineq 2022: Kommunit aallartilluartoqarneranik nalunaaruteqarput
Sermitsiaq.AG-mit nunami innuttaasorpassuit taasereersimalerneranni qinersiviit assigiinngitsut paasiniaaffigineqarsimapput.
Nunami kommunini tallimaasuni qinersisinnaatitaasut 8 aamma 14 procentiisa akornanniittut nalunaaqutaq suli aqqaninngunngitsoq taasereersimapput. Sermitsiaq.AG-mit qinersitsinermik akisussaasuusut ullup qanoq aallartissimanera pillugu oqaloqatigineqarsimapput.
Qeqqata Kommuniani Sisimiuni qinersinermik aqutsisup Hans Christian Sværdip ilisimatitsissutigaa, silagikkaluaqisoq - qinersinerup ammarneqarnerani qinersiartortut amerlavallaarsimanngitsut. Qinersisinnaatitaasut 123-t nalunaaqutaq qulinut katersortarfimmi qinersivimmut taasiartorsimapput, tassa qinersisinnaatitaasut 3,1 procentii.
Sisimiuni qinersisinnaatitaasut 9,61 procentii aqqanernut taasereersimapput.
Kommuni Kujallermi Qaqortumi qinersinermik aqutsisup Arne Møllerip oqaatigaa, ullaarnaniit innuttaasorpassuit taasiartorsimasut, maannali taasiartortartut ikiliartulersimasut. Qinersinermik aqutsisup ilisimatitsissutigaa, nalunaaqutaq aqqanernut qinersisinnaatitaasut 11,3 procentii taasereersimasut.
Illoqarfiit pingaarnersaanni qinersisinnaatitaasut 8 procentii aqqanernut taasereersimapput, taakkunannga aamma qineqqusaartut Aaja Chemnitz (IA), Aki-Matilda Høegh Dam (S) aamma Juno Berthelsen (N) taasereersimallutik.
Innuttaasut nuannaartut
Ane Joelsen Sigstad Kommuni Qeqertalimmi qinersinermik aqutsisuuvoq. Taassuma suut tamarmik pilersaarutit malillugit ingerlasimasut ilisimatitsissutigaa.
- Inuppassuit ullaarnaniit takkunnerat tupaallaatigilaarpara. Inuit nuannaarput assiliisajoorlutillu, tassa ulloq ajunngivissumik aallartissimavoq.
Kommuni Qeqertalimmi qinersisinnaatitaasut 11,2 procentii aqqanernut taasereersimapput.
Avannaata Kommuniani attaveqaqatigiittarnermut sulisoq Nikolaj Sander oqaluttuarpoq, ullaarnaniit innuttaasorpassuit takkussuussimasut.
- Nuannisartoqarpoq. Ullaarnaniit taasiartorlutik tulleriiaattorpassuusimapput. Suli takkussuuttoqartuarpoq, taanna Avannaata Kommuniani aqqanernut qinersisinnaatitaasut 14,1 procentiisa taasiartorsimanerannik ilisimatitsissuteqartoq oqarpoq.