Folketingip siulittaasuata ilinniartut ulluat ammassavaa
Atlantikup avannaamiut suleqatigiiffiata ilinniartunut ulloqartitsinerat Folketingip siulittaasuannit Thor Pedersenimit ammarneqassaaq.
Folketingip siulittaasuata Thor Pedersenip Atlantikup Avannaamiut suleqatigiiffiata ilinniartunut ulloqartitsinissaanut peqataanissani nalunaarutigisimavaa. Siulittaasup Folketingip ataatsimiinnerinik aqutsisuusartup ilinniartut ataatsimeersuarnissaat Christiansborgip Landstingssalen-iani marsip 27-iani pisussaq ammassavaa.
Ilinniartut ulluanni qulequtarineqassaaq ”Qaqqat qaaqqusigaangata”, tassani Savalimmiut, Kalaallit Nunaata aamma Danmarkip akornanni ilinniartitaanerup inuussutissarsiornerullu nikerarsinnaassusia oqallisigineqassalluni.
Thor Pedersenip saniatigut aamma aningaasaqarnermut ministeri Lars Løkke Rasmussen, Socialdemokrateniit Julie Rademacher, Enhedslistenimiit Line Barfod aamma Atlantikup Avannaani suleqatigiinni ilaasortat Høgni Hoydal, Juliane Henningsen aamma Lars-Emil Johansen - Nuup borgmesteria Asii Chemnitz Narup aamma Torshavnip borgmesteria Heðin Mortensen peqatigalugit - oqalugiartunut ilaassapput.
Saniatigut aamma Kalaallit Nunaanni nukissiuuteqarfimmi Nukissiorfiit pisortaa Svend Hardenberg Nema-milu pisortaq Christian Nagata peqataassapput.