Frederiup aamma Maryp illussaarsuaq ammassavaat
Arfininngorpamiit kikkut tamarmik Frederiup Maryllu ukiuunerani angerlarsimaffissaat Frederik VIII-p illussaarsua pulaarsinnaassavaat, ilaatigullu takusinnaassallu qalipagaq Kalaallit Nunaannik ilaqartoq.
Iikkami Frederiup allaffissaata matuata qulaani nalutsilluni isigammioq sungaarujuttoq qalipanneqarsimavoq. Taassuma Amalienborgimilu pulaartut eqqaasissavai piffissap ilaani Frederik sakkutuuni Frømandskorpsiniissimasoq.
Isigammioq tassaaginnarpoq mikisualuit inuttaanut tunngasut alutornartulu ilaat, qallunaat eqqumiitsuliortut kunngissakkut peqatigalugit Frederik VIII-p illussaarsuatoqqaanut 1700-kunnersumut eqqussimasaasa ilaat.
Taakku akornanniippoq qalipagaq inuttaanut tunngasorujussuaq, allaffimmut isertinnani utaqqisarfimmiittoq Jesper Christensenimit qalipanneqarsimasoq, tassaavorlu Danmarkip Kalaallillu Nunaata assinga illuatungaaniittoq, illuatungaaniillunili Tasmanien aamma Australien, tamannalu nalaatsornerinnaanngilaq, Realdaniami pisortaq Hans Peter Svendler oqarpoq, illussaarsuarmi eqqumiitsulianut 22 million kroninik tunissuteqarsimasoq.
- Tassani pulaartut isertinnatik utaqqisassapput. Eqqarsaataavoq utaqqinerminni Frederiup Marylu inuunerannit qalipakkat aliikkutarissagaat, Hans Peter Svendler oqarpoq.
Qalipakkat aamma Frederiup Maryllu nuutit nuannarisaasa puuisa saqqaannik arlalinnik ilaqarput. Ilaatigut Frederiup nuannarilluagaasa ilaat - nipilersoqatigiit Led Zeppelinikkut nuusiaat siulleq 1969-meersoq.
Kunngissakkut illussaarsuup iluarsaanneranni aamma peqataalluinnarput, qaammatinilu kingullerni agguaqatigiissillugu illussaarsuaq ullut 14-ikkaarlugu pulaartarsimallugu.
- Amerlanerit eqqumiitsuliortut qulit angerlarsimaffimminnik kusassaasuuppata ernumassagunaraluarput. Pinartoqarsimanngilarli, Hans Peter Svendler oqarpoq.
Frederiup Maryllu ukiuunerani angerlarsimaffiaat 220 million kronit atorlugit iluarsaanneqarpoq.