Gazamiut kaannersuaqannginniassagamik nerukkaatissat nerisarpaat

Gazap avannaani innuttaasut nerisassaaleqigamik qajuusanik karrinillu nerukkaatissatut atorneqartartunik akuliussisalersimapput.

Taamatut oqaluttuarpoq Gazami illoqarfimmi Beit Lahiyami ikiuiniaasartoq Mahmoud Shalabi tuluit tusagassiorfiannut BBC-mut.

Palæstinamiut sorsuffimmiittut qajuusaataarutiliivissut oqaluttuarpoq.

Gazap avannaani illoqarfimmilu Gazami maannakkut pisiarineqarsinnaanngillat, Mahmoud Shalabi oqarpoq.

Nerisassat qillertuusamiittut aamma nungukkiartorput, oqaluttuarpoq.

Qitornani annaanniarai

Aamma Amerikamiut tusagassiorfiat ABC News Tyrkiallu nutaarsiassaqartitsivia Anadolu allapput Gazami Palæstinamiorpassuit ajunnginnerusumik pissaqannginnamik nerukkaatissanik nerisartut.

Februaarip aallartinnerani Sami Abu Sweilem, Gazap avannaani qimaasunut tammaarfimmiittoq, oqaluttuarpoq meeqqani timmissanut nerisassanik nerukkaatissanillu allanik tunisimallugit.

- Meeqqat perlileraluttuinnarput, taamaattumik meeqqat toqunnginniassammata qanoq annaassinnaanerlutigit eqqarsaatigisimavarput, Sami Abu Sweilem ABC Newsimut oqarpoq.

BBC naapertorlugu FN mianersoqqusivoq Gazap avannaani meeqqat nerisassaaleqinissaat aarlerinartoqangaartoq annertusiartuinnartorlu.

FN-illu inunnik ikiuiniarnermut ataqatigiissaarisuisa allaffiat (OCHA) naapertorlugu Palæstinamiut 300.000-it Gazap avannaaniittut kaannersuaqarnermik eqqugaanissaat ilimanaateqarnerujartuinnarpoq.

Imermik minguitsumik amigaateqarneq

Gazap avannaani nerisassaaleqineq Israelikkut sakkutuuisa ikiuiniaqatigiit ikiuiniartut amerlasuut apuuffissaannut apuunnissaannik akornusersuinerannut pissutaavoq.

Nunarsuarmi Nerisassanik Aaqqissuussivik (WFP) BBC-mut ilisimatitsivoq ikiuiniaqatigiit Israelimit Gazap avannaanut ikiuiniaraluartut tallimaasut ilaat sisamat Israelip sakkutuuinit unitsinneqartut.

Gazap avannaani innuttaasut nerisassaaleqinerup saniatigut imermik minguitsumik pissarsiniarneq ajornakusoortittarpaat, Palæstinami sumiiffiit sinnerini aamma taamaappoq.

Israelikkut Gazamut eqqunneqartartunik nakkutilliinerat nutaajunngilaq, nerisassalli taama ikitsiginerat nutaajuvoq, soorlu sorsunnermi maannakkut atuuttumi taamaassimasoq.

Avataanit nerisassanik pisariaqartitsineq

Israelikkut Gazap killeqarfiata annersaa nakkutigaat, Egyptenimiullu Gazap kujataatungaani killeqarfik nakkutigaat.

Nerisassat Palæstinami tunisassiarineqartut Gazamiut pisariaqartilluinnarpaat.

Gazami sorsunneq aallartippoq oktobarip arfineq-aappaanni Palæstinami sakkutoorpassuit Hamasimit aqunneqartut Israelimik saassussimmata.

Hamasip 1200-t missaat toquppaat 240-llu tigusatut tiguaat.

Oqartussaasut Gazamiittut, Hamasimit aqunneqartut, naapertorlugit Israelip Gazami Hamasimut saassussinermigut inuit 28.000-ingajaat toquppai.

/ritzau/