GE: Nakkutiginninneq mianernarpoq

Inatsisissatut siunnersuut akuerineqarpat nunatsinni suliffeqarfiit tamarmik sulisumik ilaannik sulisut akornanni imerpallaartunik ikiaroornartumilluunniit atornerluisunik nakkutiginnittussamik toqqaassapput.

- Qanoq iliortoqarniarnersoq takorlooruminaappoq. Pineqartormi qajannartorujussuuvoq, allaffeqarfiup pisortaa Karsten Klausen Sulisitsisut peqatigiiffiannit oqarpoq.

Suleqataasoq nakkutilliisussatut toqqarneqartoq namminersortumi atorfilik suleqatinilu akerleriilernerinik kinguneqarsinnaasoq Karsten Klausen naliliivoq.

- Ajornakusoorsinnaavoq, sualummik suliffeqarfiit ilaanni sulinermi avatangiisit ajornakusooreertillugit, Karsten Klausen Sermitsiaq.AG-mut oqarpoq.

Atuaruk: Suleqatit imigassarsunnippa?

Nuna tamakkerlugu suliffeqarfinni inuk suleqamminut nakkutilliisuussasoq toqqarneqassasoq inatsisissatut siunnersuutigineqarpoq. Toqqarneqartup suleqatini imigassamik ikiaroornartumilluunniit atornerluisuuneranik pasitsaassiguni katsorsartinnissamik innersuissisassalluni.

Atornerluinermut ilisimasanut qitiusoqarfimmi, Allorfik-mik atilimmi, atornerluinermi inuit pingaarutillit pikkorissartinneqassasut inatsisissatut siunnersuummut tusarniaanermi paasissutissatut allassimavoq.

- Atornerluinermi inuit pingaarutillit suliassaq aallartitsinnagu ilinniartinneqarluartariaqarput, Karsten Klausen oqarpoq.

Sulisitsisut siunnersuut taperserpaat

Atornerluineq akiorniarluni inatsisissatut siunnersuutigineqartoq sulisitsisunit taperserneqarpoq.

- Aalakoornartumut ikiaroornartumullu ajornartorsiutip iliuuseqarfiginiarneqarnera ajorinngilarput, allaffeqarfiup pisortaa oqarpoq.

Suliniutaasumut paasissutissiiniarnermi ikiuussinnaallutik ilaatigut neqeroorput.

- Paasitsitsiniaanermi tapersersuerusuppugut.

Atuaruk: Naartusut pinngitsaalillugit aalakoornaveersaartinneqartalissapput

Inatsisissatup siunnersuutigineqartoq upernaaru Inatsisartunit akuersissutaassappat sulisitsisut aningaasanik atuiffigisorujussuussavaat. Ilaatigut atornerluinermi inuit pingaarutillit pikkorissartinneqarnerini sulinngiffeqartariaqassammata.

- Atornerluinermi inuit pingaarutillit nalinginnaasumik suliffimminnit sulinngittarnerat pissutigalugu aningaasartuutaasut saniatigut inatsisissatut siunnersuut inuussutissarsiutinik ingerlatsisunut aningaasaqarnikkut kinguneqarnerlunnissaa naatsorsuutigineqanngilaq, inatsimmut siunnersuummi tusarniaanermi ilaatigut paasissutissatut allassimavoq.

Suliniutilli sulisut imigassartorsimatillugit ikiaroorsimatillutilluunniit sulinngitsoortarnerat pinngitsoortissagaa ilimasuutigineqarluni.