Gedion Lyberth (S): Qeqqata Kommunia Maniitsumut nunaqarfittaanullu pitsaasumik sunniuteqarpoq

Politikkikkut oqallisaasut akornanni qaangiinnarneqarsinnaanngitsut ilagaat Maniitsup nunaqarfittaasalu aammalu Sisimiut nunaqarfittaasalu akornanni aaqqiagiinngittoqartarnera.

Innuttaasunik ataatsimiitsitsisoqartarpoq, paaseqatigiinnissaq siunertaralugu ataatsimiittoqartarpoq allatullu iliorluni kommunimi aaqqiagiinngissutaasut pillugit oqaloqatigiinnerit ingerlanneqartarlutik.

Kommunalbestyrelsimi ilaasortaq Gideon Lyberth (S) piffissangaatsiamik atuivoq illuatungeriittut inisseqqajaasartut eqqissitinniarlugit. Taanna borgmesterimut tullersortaavoq aammalu kommunip taamatut katitigaaneranut illersuisuulluni.

- Ataatsimut isigalugu ajoraluartumik Maniitsup Sisimiullu innuttaasa akornanni pitsaanngitsumik aaqqiagiinngittoqalertarpoq. Taannalu aaqqiagiinnginneq ajoraluartumik kommunalbestyrelsimi ilaasortat ataasiakkaat, aamma Maniitsumeersut akornanni annertusarneqartarpoq, inuit attaveqaqatigiittarfii atorlugit innuttaasunik sunniiniarnertut taasariaqartumik, innuttaasullu ilaasa isornartorsiuineq tamanna peqataaffigiinnalersoortaraat maluginiarnarpoq, Gideon Lyberth (S) Sermitsiaq.AG-mut oqarpoq.

Taanna peqataarusuppoq kommunip siunissaa pillugu siunnerfilimmik oqaloqatigiinnissamut, isumaqaramimi aaqqissuussaaneq taanna kommunip innuttaanut annertuumik iluaqutissiisoq, aamma Maniitsumi nunaqarfittaanilu innuttaasunut:

- Taamaassorinninneq tunngavigalugu oqallittoqarneratigut ajornartorsiuterujussuartut isikkoqalersitsisoqartarpoq. Isumaqarpunga kommunalbestyrelsimi ilaasortatut tunngavilersorluakkamik piviusullu aallaavigalugit innuttaasunut kiinnertarnissatsinnut pisussaaffeqartugut, taamaammat isumaqarpunga pissusissamisuunngitsoq inuit ilaasa sunaluunniit sakkugalugu innuttaasut aalassatsinniartassappatigit piviusorluunniit allaagaluarpat, Gideon Lyberth oqarpoq.

Kommuni eqqortumik tulleriaarivoq

Gideon Lyberth isumaqarpoq kommunit taakku marluk kattunneqaarnerisigut Maniitsoq nunaqarfittaalu ajunngitsumik ineriartortinneqartut:

- Eqqortormi tassaavoq qeqqata kommuuniata assorsuaq pikkoriffigigaa sumi pisariaqartitsineq aallaavigalugu aningaasaliineq, Sisimiuniippat Maniitsumiippat nunaqarefimmiippalluunniit apeqqutiginagu. tamanna assitatigut uppernarsaateqarluarpoq, ukiunimi kingullerni Maniitsumi nunaqarfiinilu sanaartugarpassuit eqqarsaatigalugit qanoq Maniitsoq allannguuteqarsimatigisoq, Lyberth tunngavilersuivoq.

Gideon Lyberth assersuuteqarpoq meeqqat atuarfiat Kilaaseeqqap Atuarfia pillugu ajornartorsiutit sakkugalugit kommunip innuttaasa, pingaartumik Sisimiut Maniitsullu akornanni avissaartuunnissaanik siunertaqartutut ittumik sunniiniartoqarnera.

Taassuma innersuussutigivaa iluarsaassineq sioqqullugu politikkikkut/aningaasatigut aammalu suliaminnik ilisimasallit tungaannit innersuussutit tunngavigalugit atuarfiup suliarineqarnissaanik pilersaaruteqartoqarnera erseqqissaatigalugu.

- Soorunami pitsaanngilaq atuartut ilinniartitsisuilu iluarsaassinerup nalaani nalaataqarnerlummata, taamaattorli kommunip tungaanit ajornartorsiutit aqqutaani nalaanneqartut aaqqiivigineqarnissaat suliassatut pingaaruteqartutut kinguarsagassaanngitsutullu suliarineqarpoq. Taamaattorli isumaqarpunga pissusissamisuunngitsoq kommunip illaoqarfiisa nunaqarfiisalu avissaarnissaanik piumasaqarluni aporaassutissarsiortutut pisoqarnera pissusissamisuunngitsoq.

Kommunip siunissaa pillugu oqaloqatigiittoqarli

Gideon Lyberth kaammattuuteqarpoq kommunimi ilummut qissimilluni nalilersuisoqartariaqartoq. Taanna kaammattuuteqarpoq oqaloqatigiinneq aqqutigalugu kommunip siunissaa ilusilersorneqartariaqartoq, taamatut kaammattuuteqarpoq Maniitsoq nunaqarfittaalu Qeqqata Kommunianit avissaartinneqaqqullugit sulissutiginnittoqaraluartoq:

- Kommunip innuttaasunut pitsaanngitsumik sunniuteqarnerarlugu isornartorsiuisut piviusorsiortumik uppernarsarneqarsinnaasumillu tunngavilersuigunik pissusissamisuussaaq, inuit attaveqaqatigiittarfiisigut sunniiniarluni pitsaanngitsumillu ingerlatsisoqarneraalluni siammarterineq naammanngimmat. Oqaloqatigiinniarta, tassami oqaloqatigiinneq aqqutigalugu piviusullu aallaavigalugit aatsaat ingerlaqqissinnaavugut, Qeqqata Kommuniani kommunalbestyrelsimi ilaasortaq, borgmesterimullu tullersortaasoq, Gideon Lyberth (S) oqarpoq.