GEUS: Aputip aanneranit Karrani aalasoqartoq

Karrat Kangerluanni tassaarsuaqaratarsinnaaneranut naatsorsueqqissaarnerit Naalakkersuisut maajimi saqqummiuppaat, sumiiffiit ulorianartorsiorfiusut Karrat 1, Karrat 2 aamma Karrat 3 taakku takutippaat, sisooriartornerit ulorianartorsiortitsisut ”allannguuteqaratik qaqqamit annertuumik sisoortoqarnissaanut, taamaalillutillu tassaarsuarmik aallartitsinissaanut ulorianartorsiortitsisorujussuusut”.

Qaammataasanit assilisat qaqqamit annertoorsuarmik sisoortoqarneranik takussutissiinngillat, kisiannili soorlu ujaqqat qaarsullu kaanngartut sisoorneri annikitsut arlaliullutik, Naalakkersuisut tusagassiuutinut nalunaarummi ilisimatitsipput.

Aalasoqarluartoq
De Nationale Geologiske Undersøgelser for Danmark og Grønland-ip (GEUS) misissugaanit takutinneqarpoq, Karrat 1 aamma 2 ukioq manna aputip aattulerneraniilli, tassalu apriilip naaneraniilli sisooriartungaatsiarsimasut.

Pingaartumik Karrat 2-mi qaqqap sivingarnani pujoralammik pinngortoqartartoq takuneqarsinnaavoq. Ujaqqat angisuut nakkaraangata, pujoralannguussimasunillu eqquigaangata tamanna pisarpoq. Qaqqaq nikerangaatsiartoq takuneqarsinnaavoq, tamannalu qanittukkut qaqqamit sisoortoqarsinnaaneranut takussutissaasinnaavoq. GEUS-ip naliliinera malillugu suli sumiiffimmi qaqqamit sisoortoqarsinnaanera allannguuteqarani ulorianartorsiorfiusorujussuuvoq.

- Sumiiffimmi aalasoqarluartumi ujaqqat sisoortarnerat naatsorsuutigineqarsinnaavoq. Taamaattumik ineriartornera nakkutigeqqissaarneqarpoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi pisortaq, Mette Skarregaard Pedersen, Sermitsiaq.AG-mut taama oqarpoq.

2017-imisut ajortiginngitsoq
Karrat 1-imi aamma 2-mi qaqqamit sisoortoqassappat, tamanna tassaarsuarmik pilersitsisinnaavoq. Karrat 1-imiit aamma 2-miit sisoortoqassappat mallit qarsutsineri Nuugaasiamut 4-6 meterit missaannik, Illorsuarnut 2-4 meterit missaannik aamma Uummannap Kangerluani sumiiffinni najugaqarfiusuni 0,2-0,6 meterinik portussuseqartussatut naliliiffigineqarput. Taakku 2017-imi qaqqamit sisoortoqarnerani pilersinneqartunit annikinnerugaluartut, tamanna Karrat Kangerluanni imaani angalasunut ulorianarsinnaavoq, sarfaq sakkortoorsuaq pilersinneqarsinnaammat.

Naatsorsuinerilli naapertorlugit qaqqaq 3 ulorianarnerpaavoq, annertuumik qaqqamik sisoortoqassappat malinnik sumiiffimmut annertuumut anngutissaaq, 2017-imilu takusatsinnit qaffasinnerusumut anngutissalluni.