Godmand partiimi siulittaasunngorusuppoq
Allanik sassartoqarumanngippat uanga siulittaasussarsiornermi imminut neqeroorutigisinnaavunga, inatsisartunut ilaasortaasimasoq Godmand Rasmussen Kalaallit Nunaata EU-mut ilaasortanngoqqinnissaanik kissaatilik oqarpoq.
Finn Karlsenip Atassutip siulittaasuattut tunuarnerata kingorna siulittaasussiornissamut suli sassartoqanngilaq sassartoqalerunarporli.
Godmand Rasmussen, Atassutip siulittaasoqarfiani ilaasortaq inatsisartunullu ilaasortat sinniisussaata pingajuattut inissisimasoq, siulittaasussarsiornermi allanik piumasoqanngippat qinigassanngortissinnaanerarpoq. Qineqqusaarutissaata pingaarnersaraa Kalaallit Nunaata EU-mut ilaasortanngoqqinnissaa.
- Pissusissamisuunngilaq imminut mattutissalluta allat tamarmik ilagiillutik peqatigiillutillu imminnut suleqatigiikkumasut, Godmand Rasmussen oqarpoq.
Godmand Rasmussen maannakkut partiip allattoqarfiata aqunneqarneranik isumaqataanngitsunut akuuvoq.
- Finn Karlsenip Jensine Berthelsenillu partiip siulersuisoqarfianut allagaq pingaaruteqarluinnartoq isertuussimavaat. Allagaq taanna uagut ilisimasaqarfigisimasuugutsigu naalakkersuisunngortitsiniarnermi IA, Demokraatit Kattusseqatigiillu Partiiat suleqatigisinnaasimassagaluarpagut, Godmand Rasmussen oqarpoq.
Oqaatigaa aamma allakkami nammineq tigumminngisamini allassimasoq, Atassut naalakkersuisunngortitseqataasimasinnaassagaluartoq siornatigut naalakkersuisooreertunik sassartitaqanngippata.
Atassut aggustip 29-anni 30-annilu Sisimiuni immikkut ittumik ataatsimeersuassaaq.
Atassummi pisut pillugit Sermitsiaq nr. 31-mi atuarsinnaavutit...