Google Mapsip Nunarput 'millisippaa'
Google Maps nutarterneqarsimasoq Googlep saqqummiuppaa, nunarsuaq maanna globusitut takusassanngortinneqarluni.
Kalaallit Nunaat Afrikamit anginerunngilaq. Nunarsuup assinga manissuinnaq isigigaanni Nunarput anginerusorineqarsinnaasarpoq.
Eqqornerusoq
Google Mapsip nutarterneqarnerani nunarsuaq manissuinnarmik assiliartaqarunnaarluni, zoomerlugu ungasillinissaa tamakkerlugu globusitut takuneqarsinnaalerpoq. Allannguutip tamatuma nunarsuaq eqqornerusumik ersersinnissaanut periarfissaqalersippaa.
Google Mapsip Twitteriani allannguineq Googlep erseqqissaatigaa, ‘’Kalaallit Nunaat Afrikap angissusaa assigalugu 3D Globe Modemi nutaami takusassiaajunnaarsimasoq’’ allappoq.
With 3D Globe Mode on Google Maps desktop, Greenland's projection is no longer the size of Africa.
— Google Maps (@googlemaps) 2. august 2018
Just zoom all the way out at https://t.co/mIZTya01K3pic.twitter.com/CIkkS7It8d
Mercatorimik takussutissiorneq allanngortitsisartoq
Manna tikillugu Google Mapsip Mercatorprojektion atortaraluarpaa, tassuma nunarsuaq manissuinnaatillugu takusassiarisarpaa.
Mercatorprojektion sammivinnik aamma ilutsinik eqqortunik assiliortarpoq, kisianni angissutsinik allanngortitsisarluni, ækvatorimut ungasilliartortilluni angissusaat allanngoraluttuinnartarluni. Tassani Mercatori atorlugu nunarsuup assiliarineqarnerani Kalaallit Nunaata Afrikamit anginerusutut takusassiarineqartarnera assersuutitsialaavoq, kisianni Afrikap arealia 14-eriaatingajammik angineruvoq.
Allannguut qarasaasiami taamaallaat takuneqarsinnaavoq, Google Mapsimi mobilinoortumi suli manissuinnartut takuneqarsinnaalluni.