Gore Savalimmiuni
Amerikamiu Nobelip nersornaasiuttagaanik nersornaasigaq præsidentillu tullersortigisimasaa Al Gore sapaatiummat unnulluarnerani Savalimmiunut tikippoq. Taanna atlantikoq akimorlugu nunat silaannaap pissusaa pilllugu isumasioqatigiilerpata ataasinngorpat oqalugiartut pingaarnersarissavaat.
Isumasioqatigiinneq TransAtlantic Climate Conference (tacc2008) Nunat Avallarniit Illuanni ataasinngorpat marlunngorpallu ingerlanneqassaaq. Al Gore oqalugiartut pingaarnersarissavaat, ataasinngorpallu ualikkut nunarsuaq tamakkerlugu silaannaap allanngoriartorneri oqalugiaatigissallugit, immikkut imaani avatangiisit sammissallugit.
Isumasioqatigiinnissami inuit 350-it missaanniittut peqataassapput, aamma Juliane Henningsen peqataassaaq. Ataasinngorpat Al Gorep saniatigut oqalugiartussanut ilaavoq savalimmiormiu professori Bogi Hansen, Nunat Avannarliit Pinngortitamut Avatangiisinullu tunngatillugu nersornaasiuttagaannik nersornaasigaq.
Kalaallit Nunaannit oqalugiassaaq naalakerssuisunut ilaasortaasimasoq Josef Motzfeldt (IA), taassuma kalaallit nunaannit isigalugu silaannaap allanngoriartorneri, Islandimiit oqalugiassaaq aalisarnermut ministeriat Einar K. Gudfinnsson. Danmarkimiit professor Rasmus Ole Rasmussenip silaannaap aallanngoriartornerisa kingunerisaannik nunap immikkoortuini ineriartornerit aningaasaqarnikkullu ilisimasat pillugit oqalugiassaaq.
Isumasioqatigiinneq marlunngorpat nanginneqassaaq, ulloq taanna assigiinngitsunik saqqummiussisarnernik nanginneqassaaq, tassani peqataasut oqallinnissamut tunngavissanik nunanut avannarlernut soqutiginaateqarsinnaasunik saqqummiussivigineqartassallutik.