Greenpeacikkormiut nannut 17'init iperagaasut
Edinburgh'imi eqqartuussiviup akerliuniat 17'it iperagaasippai taakku juuli qaammat Cairn Energy'p allaffeqarfissuanut isaapput
Skotlandimi illoqarfimmi Edinburghimi eqqartuussiviup Greenpeacikkormiut 17'it juuli qaammat nannutut atisalersorsimallutik skotlandimiut uuliasiorfilioqatigiiffiata Cairnip allaffeqarfissua isaaffigaat.
Akerliuniat Cairnip Kalaallit Nunaanni uuliasiorlutik qillerineranni sillimanissamik pilersaarut isertuussaq ujaaralugu allaffissuarmut isaapput. Akerliussutsimik takutitsinermik suliaqartartut 60 peqataapput, danskimik ataatsimik ilalerlutik taannali tigusaanngilaq.
- Eqqartuussiviup aalajangiinera Cairnip Issittumi peqqarniitsumik uuliasiorneranut aammaarluni akornusiivoq. Aalajangiinermi qulakkeerneqaqqippoq eqqissisimasumik pissutissaqartumillu Cairnip Issittumik qillerinerinut akerliussutsimik takutitsinerit pissusissamisoortut, Jon Burgwald, Greenpeacimi Issittoq pillugu suleqataasoq oqarpoq.
Akerliussutsimik takutitsillutik allaffissuarmut isaasut sillimaniarnermik pilersaarummik naammattoorsinngillat, aggustilli qaammataani Aatsitassaqarnermut pisortaqarfiup sillimaniarnermik pilersaarut saqqummiuppaa, taamaasilluni kikkut tamat uuliakoortoqassagaluarpat sillimaniarnissamik pilersaarummik qimerluuisinnaanngorlutik.
Qularnanngilaq Cairnip kissaatiginngikkaluaraa pilersaarutip kikkunnut tamanut takusassiarineqarnissaa. Taanna atuareerlugu erseqqippoq Issittumi uuliakoortoqassagaluarpat uuliakumik qalluisoqarnavianngitsoq, aammalu uuliakoortoqassagaluarpat nunarsuarmi sumiiffiit mianernarnerpaartaasa ilaat kingunipiloqaqisumik aserorterneqassagaluartoq, Jon Burgwald oqarpoq.