Grønlandsdialog New Yorkimi
Ataatsimiinnissaq COP15-imut piareersaataallunilu Grønlandsdialog-imik aasaq Ilulissani ingerlanneqarsimasumik malinnaaffiginnerussaaq.
Silaannaap pissusaanut nukissiornermullu ministeri Connie Hedegaard septemberip 18-ianni 19-iannilu silaannaap pissusaanik avatangiisinillu ilisimatuunik nunarsuarmit tamarmeersunik amerlanngitsunik ataatsimiititsissaaq.
– Peqataasussat silaannaap pissusai pillugit ataatsimeersuarnissami pingaarutilittut inissisimasussaapput. Nunat piorsarluarsimasut, inerisarneqartussat nunallu piitsuunerusut peqataatoqassapput, tusagassiisarnermi pisortaq Ifa Ebbensgaard Sermitsiamut oqarpoq.
Kalaallit Nunaat aamma qaaqqusaasimasoq ministereqarfiup oqaatigaa.
Silaannaap pissusaanut ministeri USA-meereerpoq Major Econmies Forum-imut Energy and Climate (MEF)-imullu septemberip 16-ianni 17-iannilu ingerlanneqartussanut peqataalluni, silaannaap pissusaanut nukissiornermullu ministereqarfik taamatut ilimatitsivoq.
Connie Hedegaardip septemberip 15-ianni USA-liarluni aallannginnermini naalakkersuisut siulittaasuat Kuupik Kleist silannaap pissusai pillugit isumaqatigiissutissaq pillugu ataatsimeeqatigissavaa.