Grønlandsk kaffi SAS Hotelimi
”Pilersaarutit pillugit ataatsimeeqatigiinneq” Napaattuup nereqatigiinnermi ataatsimiissutaani taama allassimasoqarpoq, ataatsimeeqatigiinnerli Kalaallit Nunaat pillugu politikkimik oqaluuserinnittoqanngilaq. Nereqatigereernermili kaffi imerneqartoq taamaallat oqaluuserineqartoq, ilisimannittoq oqaluttuarpoq.
Oqaluttuat politikkerluni ataatsimeeqatigiissimanernik eqqumeeqqissaat Landskarsillu akiligaanik nerisarsimanerit Ineqarnermut Attaveqarnermullu Naalakkersuisuusimasumut Jens Napaattuumut eqqartuussissutigoortut ullut pingajussaat suliarineqarput.
Ilisimannittup Imina Hammeken Jens Napaattooq Københavnimi naapippaa, Jens Napaattuup nulia Islandimit timmisartoqatigisimangamiuk. Imina Hammekenip aningaasaatini tamaasa atorlugit imminut bilitsisisimariarami aningaasaataarussimavoq.
– Paniga Danmarkimut angalaqatigivara. Aningaasaateqanngeriarama Jensip nuliatalu Cafe Stillingimut qaaqqusissutaat akuersaarpara. Paniga Københavnip ilaanukartoq.
– Allamik susassaqanngilanga perlilerlungalu. Imerniartarfiit marluk kinguninngua iserpagut. Mongolian Barbequemi unnukkut nerivugut. Unnunnerusoq SAS Radison Royal Hotelimiippugut, tassani grønlandsk kaffisorpugut immiarartorlutalu, Imina Hammeken oqaluttuarpoq. Imina piffissami tamatumani suliffisaaleqisuuvoq.
Mongolian Barbequemi nerineq SAS Hotelimilu kinguninngua grønlandsk kaffisorneq ilassinninnissamut kontomit akilerneqarput. Akiliisimanermut pappiaqqami atuarneqarsinnaavoq nereqatigiinneq tassaasimavoq pilersaarutit pillugit ataatsimeeqatigiinneq.
Nerinermi, imerniartarfimmi SAS Hotelimilu politikkimik oqaluttoqarsimanersoq aperineqarami akivoq politikkimik oqaluttumik tusarsimanani.
– Nammineerlunga politikkimik soqutigisaqartuunngilanga, aamma kattuffiit arlannulluunniit ilaasortaanngilanga. Oqaluttorsuunngilanga. Ilagigakkillu aamma oqaaseqartorsuunngilanga.
– Politikkimik oqallittoqarneranik tusaasaqanngilanga. SAS Hotelimiippugut imerniarluta.
– Jens Napaattuup SAS Hotelimi sulisut grønlandsk kaffiliornissamik ilisimasaqanngimmata ilitsersuuttariaqarsimavai.
– Eqqaamavarali oqaluttoqartoq grønlandsk kaffi tassaasoq aalakoornartorujussuusoq, Imina Hammeken unnerluussisumut oqaluttuarpoq.