GUX ilinniartunut inersimasunt toqqissisimanermik pilersitsivoq
GUX-Aasianni ilinniartut meerallit amerlanerulersimapput. Ilinniartut toqqissisimasumik avatagiiseqarnissaat atugassaqartinneqarnissaallu, ilinniartut pitsaasumik angusaqarnissaannut qulakkeerinnittuussasoq, Dorthie Siegstad isumaqarpoq
GUX-Aasianni ilinniartut 350-it missaanniipput. Ukiut pingasut ilinniarnerup saniatigut, inersimasunik ilinniartitsineq ukiunik marlunnik sivisussusilik, misiligutaasumik ukiut aappassaa ingerlanneqarpoq.
Aviisi Sermitsiaq taama allaaserisaqarpoq.
Ilaatigut tamanna pissutaalluni ilinniartut ilaqutariillu meerartallit malunnaatilimmik amerlanerulersimapput. Maannakkut ilinniartut meeraat 121-upput, taakkunannga arfinnillit tungaanut ukiullit, illoqarfimmi meeqqerivinni tallimaasuni agguataarlugit paarineqartarput. Meeqqallu sinneri amerlanertigut meeqqat atuarfiini atuartuusarput. GUX-Aasiaat ilaqutariinnut meerartalinnut illoqarfimmi inissianik 16-inik attartornikuuvoq, ilaqutariilli meerartallit amerlanerpaartaat kollegiani ineqartinneqarput.
Namminersorlutik Oqartussat attartortuupput
Namminersorlutik Oqartusaat inissianik attartortuupput, GUX-ilu nammineerluni inissianik amerlanerusunik attartorsinnaatitaanngimmat, ilinniartut meerartallit ilaat suli kollegiani najuqartariaqarput. Ilinniartullu ilaquttatik nassarlugit ilinnialertartut amerlanerulersimanerat naleqqussarfigineqartariaqartoq, GUX-Aasianni rektori Dorthie Siegstad oqarpoq.
- Inersimasunut ilinniartitsineq ukiunik marlunnik sivisutigisoq qanoq sivisutigisumik ingerlassanersoq, ilinniartunullu meerartalinnit immikkut tulluussakkamik kollegialiortoqassanersoq, maannakkumut suli ilisimanngilarput. Ilinniartulli pitsaasunik avatangiiseqarnissaat, ilinniartullu meerartaasa paarineqarnissaanut periarfissaqartitsinissarput pisussaaffigigaarput, rektori oqarpoq.
Allaaserisaq tamaat Sermitsiami atuaruk. Uani ataani linki aqqutigalugu aviisimut isissutissarsigit: