GUX-imi kalaallisoorneq: »Nalorninartorujussuarmiittoq«
Ilinniarnertuunngorniarfinni ilinniartitsisut ilinniartut kalaallisut pitsaanerpaamik ilinniartissinnaajumallugit sukataarput. Kisianni: - Atuartitsissummut taama pingaaruteqartigisumut inunnik amigaateqarneq ajornartorsiuterujussuuvoq, oqartoqarpoq.
Oqaatsivut nukittorsarneqarlutillu salliutinneqassapput. Naalakkersuisoqatigiinni partiit, Siumup IA-llu, anguniagaasa ilaat taama nipeqarpoq. 2025-mi pisortat suliffeqarfiini sulinermi oqaatsit kalaallisuujussasut, Siumup aamma anguniagaraa.
Aviisi AG taama allappoq.
Sumiiffinnili arlalinni oqaatsit pillugit suliniutit ullumikkut kinguaattooqqapput. Ilaatigut atuartitsinermik suliaqarfimmi.
Assersuutigalugu kalaallisut ilinniartitsisinnaasunik ilinniarnertuunngornianut ilinniartitsisut ikippallaat ilinniagaqartarput. Siunissami aqutsisussat amerlasuut GUX-ini ilinniartinneqartarput, taamaattumik oqaatsinut tunngatillugu politikkikkut anguniakkat annertuut angujuminaannerulersinnaapput.
Inatsisartuni ilaasortat oqaatsinut tunngasunik tappiffeqartut ilaat tassaavoq IA sinnerlugu Inatsisartunut ilaasortaq Mariia Simonsen. Kalaallit Nunaanni Oqaasiliortunut ilaasortaallunilu ukiorpassuarniIlisimatusarfimmi ilinniartitsisuusimavoq.
- Ilinniartitsisunik kalaallisut oqaasilinnik amigaateqartoqarnerata ajornartorsiutaanera qanoq annertutigiva?
- Ilinniarnertuunngorniarfimmi atuartitsissummut pingaarutilerujussuarmut ilinniartitsisunik amigaateqartoqarnera ajornartorsiuterujussuuvoq. Kalaallinik inuusuttunik perorsaanermik suliami oqaatsitigut tunngaviit ajunngitsuunissaat, kikkut tamarmik ilitsoqqussaralugu oqaatsiminnik qularnaatsumik atuisinnaanissaat oqaatsinillu allanit sunnerneqarnerup annikillisarneqarnissaa pingaaruteqarpoq. Ataatsimut isigalugu oqaatsitta immikkuullarissut sapinngisamik ajoqusernagit attatiinnarnissaat pingaaruteqarpoq, Simonsen akivoq.
Aviisimi AG-mi atuarnerusinnaavutit. Aviisi uani pissarsiariuk:
