GUX: VR-imik isarussat ilinniartitsinermi atorneqalersut
Tusass, Nuuk GUX aamma SiliconHagen qanimut suleqatigiillutik Virtual Reality (VR)-ikkut atuartitsissutinik ineriartortitsisimapput. Misiliutitut suliniut tamanna siullersaavoq.
VR-imik isarussat, isarussat atorlugit internetikkut pinnguaatit atorlugit inimi issiavimmilu silarsuaq allaalluinnartoq Kalaallit Nunaanni inuusuttut amerlasuut misigisareerpaat.
Maanna Tusass, GUX aamma SiliconHagen maanna ilinniartitsissutissanik ilinniarnertuunngorniarfimmi atorneqarsinnaasunik ineriartortitsipput. Tamanna Tusassip nittartakkamini paasissutissiissutigaa.
Pingasunngornermi februaarip 21-anni kemiimik atuartitsinermi VR-imik isarussat siullerpaamik atorneqarput.
- GUX-imi ilinniartitsisunik pissanganartumik suleqateqarsimanerput, Kalaallillu Nunaanni assigineqanngitsumik pilersitsisinnaasimanerput tulluusimaarutigaarput. Suliniut virtual realityp ilinniartitseriaatsinut nalinginnaasunut nutaaliatut ilanngunneqarnissaanut periarfissiivoq. VR-teknologi virtuellellu silarsuai pilersissimasagut sammisanut ilisimatusarnernut tunngasunut misigisassanik nutaanik sungiusaatinillu ilanngussipput, SiliconHagenip pilersitsisua pisortaaneralu Jan Ståhlberg oqarpoq.
Atorneqarnissamut piareertoq
Misiliutitut suliniut misilinneqareerluni kemiimik atuartitsinermi maanna atorneqarsinnaavoq. Tassani atuartut kemikaliat tunngaviusullu pillugit ilinniarsinnaapput misileraasinnaallutillu, isumannaallisaanermut atortunik soorlu killanik, aaqqatinik, qanermut assiaqutinik isarussanillu atuinatik, misileraanerit VR-imik isarussanik avataarsuani ingerlanneqarmata. Tamanna atuartut ilinniarnissamut kajumississutigaat:
- Kemiimik ilinniartitseriaaseq nutaaq nuannareqaara, kemikaliat akuutissallu assigiinngitsunik periaaseqarlutik pinnguaatigineqarsinnaammata. Pappiaqqamut allannagit titarnagillu 3D-millu suliaralugit soqutiginarnerupput, taamaalillunilu sananeqaataat paasilluarneruneqarsinnaallutik, Nadia Saandvig Qvist Immanuelsen, Nuummi GUX-imi ilinniartoq, oqarpoq.
Nuannaarutaasoq
Lone Andersen, GUX-imi kemiimik ilinniartitsisoq kemiimik ilinniartitsisut peqatigiiffiannilu siulittaasoq aamma nuannaarpoq:
- VR-imi ilinniartitsissutit ilinniartitsisunut matunik nutaanik ammaasinnaapput. Ilinniarnermi misigisassanik allatut ilusilinnik pilersitsinissamut periarfissiipput, assersuutigalugu ilinniartut kemiimi suleqatigiillutik vertuellekkut escaperoom naammassiniarsarissavaat, oqarpoq.
Tusass, ullumikkut meeqqat atuarfiini programmiliornermik ilinniartitsiffiusoq, ilinniartitseriaatsinik ineriartortitseqataasimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...