Namminersulivinniarneq
Hammond Kielsenimut: Namminersulivinniarneq unitsikkallaqinagu
Naalakkersuisunut siulittaasoq Kim Kielsen tusagassiortunik katersortitsissaaq marlunngornerup ullaani. Namminersulivinniarnermut sulineq pillugu ilaatigut saqqummiissaaq
Aleqa Hammondip oqaaseqaataata ilaneqarneranik imaqarluni allaaserisaq nutarterneqarpoq
Naalakkersuisut Siulittaasua Kim Kielsen matumuuna Naalakkersuisut marlunngornermi tusagassiortunik katersortitsinissaanut marlunngornermi nalunaaqutaq 11.00 aggersaavoq.
Tusagassiortunik katersortitsinermi Kim Kielsenip eqqartorniarpai 'Pisortat suliassaqarfiisa ineriartortinneqarnerat pillugu ataatsimeersuarnissaq' aamma 'Namminersulivinnissaq pillugu isummat'.
Namminiilivinniarnermut sulineq unitsinneqarallartoq
Kalaallit Nunaanni ajornartorsiutit iluarseqqaartinnagit Danmarkimit namminiilivinnissaq sulissutigineqalersinnaanngitsoq Kim Kielsen oqarpoq. Namminiilivinnissamut suliaq Kalaallit Nunaanni inuusuttut suliassariumaaraat aamma oqaatigaa, tamanna Sermitsiaq.AG-mit allaaserineqartareerpoq.
Isornartorsiorneqarlunilu ilalerneqarpoq
Namminersulivinniarnerup unikaallatsinneqarnera assigiinngitsunit ilalertinneqarpoq soorlu Peqatigiiffik Naalagaaffeqatigiiffimmit.
Taamaakkaluartorli Naalakkersuisunut siulittaasuusimasup Aleqa Hammondip taamatut oqariartornera isornartorsiorpaa.
Facebookimi quppernermini ataasinngormat ilaatigut ima allappoq:
- Inuiaat kalaallit toqqammavissaaleqinngeqaat. Aningaasaq kisiat toqqammavilersuutigineqassappat tassuunartaatigut uanga isumaqataasinnaanngilanga. Naalagaaffinngornissami inuiaat nunaminni aningaasanngorsinnaasut isumaqatigiinniutigineqarsinnaasut aammalu nalilissuit aallaavigalugit imminut napatissinnaassuseqarneq toqqammaviginissaanut ilapertuutaapput.
- Pingaarnerpaarli tassaavoq nikanginnginneq, imminut tatigineq, tatisimaneqarnermut akerliliisinnaaneq, uummatikkut eqqarsartaatsikkullu kiffaanngissuseqareerneq, imminut tunngavigaluni qunusuilluni angisuunik oqalussinneq, imminut napatissinnaanermik upperinninneq minnerunngitsumillu qallunaat nunaannik isumalluuteqartuarnissamik allannguerusussutsimik angisuumik peqarneq.
Tusagassiortunik katersortitsineq Sermitsiaq.AG-mit malinnaaffigineqassaaq