Hans Enoksenip atsioqatigiinneq nuannaarutigaa
- Atsiorneq Kalaallit Nunaata oqaluttuarisaanerani nutaajunerusumi pisoq pingaarutilerujussuuvoq, kalaallit qallunaallu Namminersorneq pillugu Isumaliutissiissutaat maanna naammassimmat isumalioqatigiissitallu ilaasortaanit atsiorneqarmat Hans Enoksen taamak oqarpoq.
– Nuannaarutigeqisannik ullaap-tungaa nalunaarfigineqarpunga, Namminersorneq pillugu Isumalioqatigiissitap kalaallit qallunaallu namminersorneq pillugu isumaliutissiissutaat maanna naammassilluni isumalioqatigiissitap ilaasortaanit atsiorneqartoq, Hans Enoksen oqarpoq.
- Atsiorneq Kalaallit Nunaata oqaluttuarisaanerani nutaanermi pisimasuuvoq pingaarutilerujussuaq. Atsioqatigiittoqarneratigut uagut maanna inuiattut malunnaatilimmik ineriartornitsigut ingerlariaqqissinnaalerpugut. Suli nuannaarutigineruara isumalioqatigiissitami kalaallit ilaasortaatitaat suliami ataatsimoorlutik naapissinnaasimammat, taamatu ataatsimut isumaqatigiillutik isumaliutissiissut ullumikkut atsiorsinnaallugu.
– Kalaallit Nunaanni tamassi uummammik pisumik pilluaritsi, taamak Naalakkersuisut siulittaasuat Hans Enoksen isumaliutissiissutip atsiorneqarnranut atatillugu oqarpoq.
Naalakkersuisut siulittaasuata aamma ilisimatitsissutigaa, Namminersorneq pillugu paasititsiniaanissaq aallartissasoq, Isumalioqatigiissitap ilaasortaasa isumaliutissiissut siunissami qaninnerpaami Katuami ilisaritereerpassuk.
Namminersorneq pillugu Isumalioqatigiissitami ilaasortat tamarmiullutik isumaliutissiissut atsiorpaat, Dansk Folkepartip ilaasortaatitaa ikinnerussuteqarluni oqaaseqaammik atsiugaqarluni.