Hans-Pavia Rosing toquvoq
Hans-Pavia Rosing kalaallit oqaluttuarisaaneranni nutaajunerusumi nuimasut ilagisimavaat
Hans-Pavia Rosing ippassaq taqqamigut milittoorluni toquvoq. Ilaqutaasut Facebookimi taama nalunaaruteqarput. Taanna 70-nik ukioqarluni toquvoq.
Hans-Pavia Rosing kalaallit oqaluttuarisaaneranni nutaajunerusumi nuimasut ilagisimavaat.
Taanna 1980-imi siullersaalluni ICC-mi siulittaasunngorpoq, 1986 tikillugu tassani siulittaasuuvoq. Inuit Kalaallit Nunaanni, Canadami aamma Alaskami ataatsimoortinneqarnerat taassuma suliaasa annertuut ilagaat.
Hans-Pavia Rosing 1987-mit 2001-imut Siumumit Folketingimut ilaasortaavoq. Amerikamiut Pituffimmi radarimik rakettinut illersuusiornissamut pilersaarutaannut taanna akerliusimavoq.
Danmarkip Qalasersuup eqqaani sumiiffinnut oqartussaalernissamut siusinaarluni piumasaqarnissaanut oqariartuuteqarsimavoq.
Folketingimut ilaasortaannginnermini Inatsisartunut ilaasortaallunilu aningaasaqarnermut naalakkersuisuusimavoq.