Hans Rafaelsen akornatsinniikkunnaarpoq
Ujakkaarnermik piginnaasalik ilungersuussilluartorlu Hans Rafaelsen ilaquttami akornanni Aasianni ataasinngornermi toqukkut qimaguppoq.
Ataasinngornermi unnukkut Hans Rafaelsenip illuata silataani inuppassuit naneruuserlutik tussiarlutillu katersuupput, ukiorpassuarni ujakkaarnermi sungiusaasoq, ilungersuussilluartoq ASP-mi Aasianni ataqqinaammik ilaasortaq ataqqiniarlugu.
Hans Rafaelsen piffissami sivisuumi kræfterluni napparsimareerluni ilaquttaminit najorneqarluni ulloqeqqata kingorna anerningerpoq. 69-inik ukioqarluni toquvoq. Taassuma qatanngutaa Aron Rafaelsen ilaqutariit sinnerlugit Sermitsiaq.AG-mut taama oqaluttuarpoq.
Taanna Nivaami 09. Juli 1953-imi inuuvoq.
Hans Rafaelsen ukiut 50-it sinnerlugit ujakkaartartuuvoq, tassanilu maligassiuisuullunilu inuusuttut timersornikkut aamma kajumissutsimik sulinermut kajumilersittarpai, tamannalu timersornermik nammataqartuuvoq. Taanna nammineerluni timersullammaanikuuvoq, 61-inillu ukioarluni Aasianni ujakkaarluni marathonimi ajugaavoq. 2011-mi Faxe-legati ukiuni 40-ni tunniunneqartuni annerpaasoq timersullammattut nersornaat pissarsiaraa.
Hans Rafaelsenip nuliani, panini ernuttanilu marluk qimappai, kiisalu sisorartartut peqatigiiffiat ataqqinaammik ilaasortatut Aasiannilu timersornermik ilungersuussilluartutut eqqaamaneqarfissani aamma qimappaa.
Nersornaasigaanerpassuit
Hans Rafaelsen arlaleriarluni ujakkaarluni timersornerup iluani annertuumik suliaqarnerminut aamma kajumissutsimik sulinerminut nersorneqartarpoq. Kingullermik oktobarimi siorna Maligassiuisut Show ingerlanneqarmat, Hans Rafaelsenip ujakkaartarnermi ukiuni qulikkaani amerlasuuni suliaqarsimanera nersorniarneqarpoq.
Novembarimi Hans Rafaelsen pillugu illoqarfinni arfinilinni tapersersuiniarluni arpatsitsisoqarpoq, tassunga aningaasanik ilaqutaanullu katersiniartoqarpoq, piffissami tassani kræfternerminut katsorsarneqarluni Danmarkimiippoq.
Ilisineq sisamanngornermi nalunaaqutaq 13.00 Aasianni pissasoq, ilaqutariit naatsorsuutigaat, kisianni palaseqarfimmit inissinneqariarpat paasissutissiisoqarumaarpoq, Aron Rafaelsen ilisimatitsivoq.