piumasaqaat
Hardenbergip kukkusoqarneranik nalunaaruteqaqqusimanera pillugu Atassut: Oqaaseqarfigissanngilarput
Kukkusimanermik imaluunniit naqqiinissamik Naalakkersuisoqarfimmi pisortap Svend Hardenbergip folketingimut ilaasortaasimasumut Nick Nielsenimut piumasaqarsimanera Atassut oqaaseqarusunngilaq
Qaffasinnerpaamik atorfilittap Svend Hardenbergip Folketingimi ilaasortaasimasumut Nick Nielsenimut oqaluttarfimmiit oqaaserisimasaanut tunngatillugu eqqunnginneraanissamik peqqusisimanera Demokraatinit sisamanngornermi pisumut naliliinertik saqqummiuppaat.
Demokraatiniimmi oqaatigineqarpoq Kim Kielsen isumaqatigiissuteqarfigereerlugu Svend Hardenberg piumasaqaat Nick Nielsenimut nassiunneqarsimasoq. Taamaattoq pisoq akuerineqarsinnaanngitsuusoq IA-mti nalunaarutigineqarpoq.
Atassut oqaaseqarusunngilaq
Partiit sinneri Nick Nielsenip pineqarsimaneranut akuersinnginnerminnik nalunaaruteqartariaqartut Inuit Ataqatigiinnit piumasarineqarpoq. Tamanna pillugu Atassutip qanoq inissisimanera Sermitsiaq.AG-mit paaserusunneqaraluarpoq.
'Partiit sinneri Nick Nielsenip pineqarsimaneranut akuersinnginnerminnik nalunaaruteqartariaqarput – taamaattoqanngippammi akuersaarnertut paasisariaqarpoq', Inuit Ataqatigiinnit Inatsisartuni ilaasortaq Aqqaluaq B. Egede allappoq.
Ineqarnermut, Sanaartornermut Attaveqarnermullu Naalakkersuisoq,
Naalakkersuisut Siulittaasuata tullersortaa tulleq Atassummilu siulittaasoq Knud Kristiansen Sermitsiaq.AG-mit apersorneqarumanngilaq.
- Paragraf 37 naapertorlugu Inatsisartuni ilaasortamit apeqquteqartoqarsimanera Knud Kristiansenimit ilisimaarineqarpoq. Apeqqutigineqartup akissutigineqarnissaa sulissutigineqarpoq. Taamaammat annertunerusumik suliaq pillugu Knud Kristiansen oqaaseqarsinnaanngilaq, Knud Kristiansenip allattaa politikkikkullu siunnersortaa Jensine Berthelsen Sermitsiaq.AG-mut mailimik allappoq.
Naalakkersuisut siulittaasuata Kim Kielsenip oqaaseqartinneqarnissaa Sermitsiaq.AG-mit suli utaqqineqarpoq. Kim Kielsen tutsiuteqqinnissani pingasunngormat neriorsuutigaa.
AG-mi allaaserineqartut 'IA-p atorfilittat politikerimut peqqusinerat tupigusuutigaa' aamma 'Nick Nielsen: Naalakkersuisut siulittaasuat Kim Kielsen kisermaassiniarpoq' aviisimi atuarneqarsinnaavoq. Aviisi uani pisiarineqarsinnaavoq: