Hasheerniartartut coronamit ajornartorsiortinneqartut
Timmisartukku angallassisoqarpiannginnerani, anngiortumik eqqussuisartut imaatigut Kalaallit Nunaannut eqqussuisariaqarput. Corona atornerluisut akornanni eqqissiviilliortitsinerulersimavoq.
Coronap atugaanerani hashimik pujortartut qanoq ippat?
Apeqqut taanna aviisimi AG-mi sammineqarsimavoq.
Nunarsuarmit tamarmit tusarsaavoq, cannabisimut akigititat qaffakkiartortut. Nunat matuneqaraangata tuniniaasartut ajornartorsiulersarput. Assersuutigalugu Norgemi tusagassiorfinnit nalunaarutigineqarsimavoq, hash grammimut 200 koruuninik akeqarsimasoq. Maannalu 500 koruuninik akeqalersimasoq.
Kalaallit Nunaanni politiit erseqqissumik oqaatigisinnaanngilaat, nuna nunanut allanut qaammatip ataatsip matuma siorna matuneqarmalli, akigititat qanoq issimanersut. Chefpolitiinspektørili Svend Foldager naapertorlugu, inerteqqutaasumik tuniniaanissamut pilersuiniarneq ajornartorsiortinneqartoq.
Eqqunneqartartut annikinnerusut
– Hashit ilarpassui timmisartukkut Atlantikukkoortartukkut eqqunneqartarput. Ukiorpassuarni arsaarinnissutaasarsimasut tamanna takutippaat. Inuimmi hashimik anngiortumik eqqussuisartut »nersortarialimmik« siunertaqarlutik nunamut iserneq ajorput. Maannakkorpiarlu inuit nersortarialimmik siunertallit kisimik nunamut isersinnaatitaapput. Tamannaannarlu pissutigalugu hashi annikinnerusoq Kalaallit Nunaannut eqqunneqartarpoq, Svend Foldager Sermitsiaq.AG-mut oqarpoq.
Timmisartulli ingerlaannginnerat hashimik anngiortumik eqqussuisarnermik unitsitsivinngilaq.
Ilanngutassiaq tamaat AG-mi atuaruk - ugguuna iserfigisinnaavat: