hashimik eqqussuineq
Hashimik eqqusseriartartut sakkumik nutaamik paasineqartut
Hashimik eqqussuineq akiorniarlugu ukioq ataaseq sinnilaarlugu sakkoq nutaaq atorneqarsimavoq, taannalu iluatsilluarsimavoq.
Timimut scannerut atorlugu inuit 15-it iioraallutik hashimik eqqusseriaraluartut paasineqarsimapput. Inullu amerlasuunik aningaasaanik tigummiartoq paasineqarmat, oqartussat aammattaaq iluanaaruteqarput.
Inuit 302-t scannertissimasut
Timimut scannerut 2016-ip naanerani Kangerlussuup mittarfiani atulerneqarneraniit inuit 302-t pasineqarnertik tunngavigalugu scannertinnissaq akuerisimavaat.
Scannerinernilu 5,25 procentiini hashimik eqqusseriarnerit aningaasanilluunniit tigummisaqarnerit oqartussanit paasineqartarsimavoq. Angusaq, Akileraartarnermut Aqutsisoqarfiup pisortaata Kim Neumann Nielsenip, naammagisimaarpaa.
- Akileraartarnermut Aqutsisoqarfiup, timimut scannerutip atorneqara oqartussanut angalasunulli pitsaasutut isigaa. Timimummi scannerut sulinermut oqilisaataavoq, innuttaasumulli pasineqarnermigut misissorneqarneranut oqilisaaqataalluni,
Kim Neumann Nielsen Sermitsiaq-Ag-mut oqarpoq.
Timikkut misissortinnissaq pinngitsoortikkaa
Siornatigut akitsuusersuisut hashimik eqqusseriartumik pasitsaataqartillutik timimik tamakkiisumik misissuisariaqartarsimanerat ilaatigullu napparsimavimmi scannerisariaqartarsimaneri, taassuma tikkuarpai.
- Periuseq taanna piffissamik atuinarlunilu aningaasartuutaangaatsiartarpoq, akileraartarnermut pisortaq timimut scannerutip Kalaallit Nunaanni timmisartoqarfiit anginersaanni atulersinneqanngitsiarnerani erseqqissaavoq.
Pinaveersaartitsinerup sunniutai
Timimut scannerut pinaveersaartitsinermik iluaqutaalluarsinnaalluarpoq. 2017-immi aallartilaarnerani hashimik eqqusseriaraluartut amerlanersaat paasineqarsimapput.
- Scannerut pinaveersaartitsinermut pitsaasumik sunniuteqarsimasutut isigaarput, aqutsisoqarfimmi pisortaq naammagisimaarluni oqarpoq.