Hashimik eqqussisimasoq 34.400 koruuninik akiligassinneqarpoq
Paamiuni hashimik suliani pingasuni unnerluutigineqartut akiligassinneqarput pineqaatissiinerlu pinerloqqissanngippata atuukkunnaartussanngortinneqarluni.
Angutit pingasut hashimik eqqussuisimasutut unnerluutigineqaramik annertuumik akiligassinneqarput. Paamiuni eqqartuussivimmi suliat taakku sapaatip akunnerata siuliani suliarineqarput.
Eqqartuussiviup unnerluutigineqartut akiligassippai isertitsivimmiitinneqartussanngorlugillu, taamaattorli assingusumik pinerluuteqaqqinngikkunik pineqaatissiissut atorunnaarsinneqassalluni.
Akiligassaq annerpaaq 34.400 koruuniuvoq, taanna angutip 37-nik ukiullip 2023-mi februaarip 14-ani Danmarkimit Kalaallit Nunaannut angalanermini hashimik 344 gramimik vodkap puuanut toqqorsimasumik eqqussinermigut akiligassarsiaraa.
Angut 37-nik ukiulik ulluni 45-ni isertitsivimmiitinneqartussanngorpoq, taamaattorli ukiut marluk iluani misilinneqassaaq, assingusumillu pinerluuteqaqqinngikkuni isertitsivimmiittariaqassanani. Pineqaatissiinermi hashi 344 grami aamma arsaarinnissutigisassanngortinneqarpoq.
Angut 68-inik ukiulik hashimik 115 grammimik eqqussisimasutut 11.500 koruuninik akiligassinneqarpoq.
Angut 49-nik ukiulik 2022-mi marsip 24-ani hashimik 304 gramimik nassataminiititsisimasutut 30.400 koruuninik akiligassinneqarpoq. Unioqqutitsinermi aamma ulluni 40-ni isertitsivimmiitinneqartussanngorpoq, taamaattorli ukiut marluk iluani misilinneqassaaq, assingusumillu pinerluuteqaqqinngikkuni pineqaatissiissut atorunnaarsinneqassaaq, suliamilu aningaasartuutit akilissavai.
Ikiaroornartumik eqqussuinermut tunngatillugu suliat sisamaat Paamiuni suliarineqartussaagaluarpoq, suliarineqanngikkallarlunili kinguartinneqarpoq.