Hashimik eqqussisutut eqqartuunneqartoq: RAL-ip umiarsuaataani 12 kilot toqqorsimagai
Angut RAL-ip umiarsuaataani hashimik 12 kilomik toqqorsilluni nunatsinnut eqqusseriarsimasutut eqqartuunneqarami ukiuni marlunni qaammatinilu arfinilinni pineqaatissinneqarsimasunut inissiisarfimmiittussanngortinneqarpoq.
Angut 51-inik ukiulik Royal Arctic Linep umiarsuaataani hashimik 12 kilomik toqqorsilluni nunatsinnut eqqusseriarsimasutut eqqartuunneqarami ukiuni marlunni qaammatinilu arfinilinni pineqaatissinneqarsimasunut inissiisarfimmiittussanngorlugu pineqaatissinneqarpoq. Ikiartoornartut eqquteriarneqartut aamma arsaarinnissutigineqarput.
Angut 51-inik ukiulik Sermersuup Eqqartuussiviani sisamanngornermi 14. september eqqartuunneqarnermini nassuerpoq hashimik 25. novemberimi 2022-mi eqqusseriarsimalluni. Eqqartuussiviup aalajangernera eqqartuunneqartup aamma unnerluussisussaatitaasup akueraat.
Kalaallit Nunaata Politiivisa umiarsuup assartuutip silataatungaani karsi savinermit sanaaq hashimik 12 kilomik imalik siorna nassaaraat.
- Umiarsuup nunatsinnukannginnermini Aarhusimiinnerani angutip karsi saviminiusoq hashimik imaqartoq umiarsuup silataatungaanut ikkussimavaa. Umiarsuaq aallareermat nammineerluni nunatsinnut angalasimavoq, umiarsuullu tikinnerani karsi eqqunneqartoq nammineerluni peertussaasimallugu, Kalaallit Nunaata Politiivi allapput.
Tuninerani 6 mio. kr.-nit isertitsissutaasinnaasut
Hashi taama annertutingisoq aqqusinermi tuniniarneqaruni 6 mio. koruuninik isertitsissutaasinnaasoq, Nuummi november 2022-mi politiinit nassaarineqarpoq arsaarinnissutigineqarlunilu.
Eqqartuussineq nassuernertut ingerlanneqarmat takunnissimasunik eqqartuussivimmi sassartitsisoqanngilaq. Angut 51-inik ukiulik hashimik eqqusseriarsimanini ingerlaannartumik nassuerutigaa.
- Hashi taama annertutingisoq nunatsinnut taama pilersaarusiungaatingisumik eqqunneqartoq takusinnaatillugu, pinerlunneq sakkortulluinnartutut nalilerneqartariaqarpoq. Angut unnerluunneqarnermini nassuerutiginnikkaluartoq, tamanna suliamut sakkukinnerusumik aalajangertoqarnissaanut tunngavissaanngitsoq isumaqarpugut. Taamaammat unnerluussisussaatitaasut pineqaatissiinissamut piumasaat eqqartuussiviup malimmagu, iluarisimaarparput, unnerluussisussaatitaasoq Cecilie Stürup Sørensen oqarpoq.