Hashimik eqqussisutut eqqartuunneqartoq
Kalaaleq suliffiutilik 41-nik ukiulik Nuup Eqqartuussiviani ukiut sisamaasa affaani pinerluuteqarsimasunut inissiisarfimmiittussanngortinneqarpoq hashimik eqqussisimasutut, pineqaatissinneqarninili Landsretimut ingerlateqqippaa.
Sisamanngormat oktobarip 22-anni kalaaleq suliffiutilik 41-nik ukiulik Nuup Eqqartuussiviani ukiut sisamaata affaani pinerluuteqarsimasunut inissiisarfimmiittussanngortinneqarpoq hashimik 14,5 kiilumik eqqussisimasutut.
Angutip pineqaatissinneqarnini ingerlaannaq Landsretimut ingerlateqqippaa.
Unnerluussisut piumasarisimavaat hashimik katillugu 24 kiilumik eqqussisimasutut pineqaatissinneqassasoq, eqqartuussiviulli hashimik 14,5 kiilumik eqqussisimasutut pineqaatissippaa.
- Hashimik 12 kiilumik marloriarluni eqqussisimasutut eqqartuussaaqqusimavarput, 14,5 kiilumilli eqqussisimasutut pineqaatissinneqarpoq. Maanna pineqaatissinneqarnini Landsretimut ingerlateqqippaa, taamaattumik pisimasoq annertunerusumik oqaaseqarfigisinnaanngilara suliaq ingerlateqqissagatsigu, ikiaroornartunik akiuiniartut pisortaat Finn Jeppesen, Nuummi politiineersoq, oqarpoq.
41-nik ukiulik suli sapaatit akunnerini sisamani tigummigallarneqassaaq.