Nuuk
Hashimik eqqussuisoq ukiut pingasut pineqaatisinneqarpoq
Nunatta Eqqartuussiviata hashimik eqqussuisup pineqaatissinneqarnera naqissuserpaa
Angut ikiaroornartumik hashimik 9 kilo sinnerlugu annertussusilimmik eqqussuisimavoq 3 millioner koruuningajannik isertitsissutigisaminik. Maanna ukiuni pingasuni pinerluuteqarsimasunut inissiisarfimmiittussanngorlugu eqqartuunneqarpoq.
Anngiortumik eqqussuineq siorna junimi paasineqarpoq akileraartarnermut aqutsisoqarfiup qimmiisa Nuup umiarsualiviani sungiusarneranni hashi qimmimit naamaneqarmat. Politiit aggersarneqarput kingornalu paasinarsivoq ikiaroornartumik annertuumik eqqussuisoqarsimasoq.
Eqqussuineq ukiuni sisamani ingerlasimavoq piffissap taassuma ingerlanerani hashi 9 kilo sinnilik eqqussorneqarsimalluni eqqartuunneqartorlu 2,7 millioner koruuninit amerlanerusunik isertitsitaqarsimalluni.
Paasiniaanermi hashi 1,25 kilo arsaarinnissutigineqarpoq aningaasallu isertinneqartut 2,7 millioner koruunit missaat arsaarinnissutigineqarlutik
Eqqartuussut iluarisimaarpaat
Angut pineqartut januarip qaammataani Sermersuup Eqqartuussivianut sassartinneqarpoq ukiunilu pingasuni pinerluuteqarsimasunut inissiisarfimmiittussanngortinneqarluni. Maannalu tamanna Nunatta Eqqartuussivianit naqissuserneqarpoq.
- Unnerluussisussaatitaasut naammagisimaarpaat angut piumasarput malillugu eqqartuunneqarmat. Ukiuni pingasuni pinerluuteqarsimasunut inissiisarfimmiittussanngortitaaneq eqqartuussissutit sakkortunerit ilagaat.
Nunatta Eqqartuussiviata eqqartuussut ilalerpaa innersuussutigalugu eqqussuineq piffissami sivisuumi ingerlasimasoq; hashi annertooq eqqussorneqarsimasoq; aammalu eqqussuisup aningaasarpassuarnik iluanaaruteqarsimanera aammalu pinerlunneq aaqqissuussaarpalaartumik pisimammat, politimestereqarfimmi unnerluussisoq Henrik Prien-Larsen oqarpoq.