Hashimut tunngasut arlallit eqqartuussivimmi suliarineqassapput

Kalaallit Nunaannut hashimik eqqussuisarneq politiinut, ilanngaaserisunut eqqartuussisunullu suliassarujussuuvoq.

Sapaatip-akunnerani matumani Sermersuup Eqqartuussiviani hashimik eqqussuinermut tunngasut annikitsut arlallit Paamiuni suliarineqassapput.

Hashimik eqqussuinermut tunngasut katillugit sisamat eqqartuussivimmi suliarineqassapput, unnerluutigineqartullu akiligassinneqangaatsiarnissaat aamma eqqartuunneqarnerminni iluatsitsippata pineqaatissiinngikkallartumik eqqartuunneqarnissartik naatsorsuutigisinnaavaat. Pineqaatissiinngikkallartumik eqqartuunneqarneq isumaqarpoq pineqaatissinneqartoq aatsaat pinerluttulioqqikkuni pineqaatissinneqarnini naammassissagaa.

Unioqqutitsiniarnerit ilaat marluk 2022-mili pisimapput.

Pisimasut taakku sisamat unnerluussutini ima allaatigineqarput:

• Angut 33-nik ukiulik Danmarkimit Kalaallit Nunaannut 2023-mi juunip aappaani hashinik 193,5 grammimik eqqussisimasutut unnerluutigineqarpoq. Hashi angutip qarliini toqqorneqarsimavoq, kisiannili paasineqarluni. Unnerluutigineqartoq 20.000 koruuninik akiligassinneqarnissaa ullunilu 40-ni isertitsivimmiitinneqartussanngornissaa, taamaattorli ukiup ataatsip iluani misilinneqarnissaa, assingusumillu pinerluuteqaqqinngikkuni pineqaatissiissut atorunnaarsinneqassasoq unnerluussisup piumasaraa.
• Angut 37-nik ukiulik hashimik 344 gramimik 2023-mi februaarip 14-iani eqqussisimasutut unnerluutigineqarpoq. Hashi taanna Danmarkimit Kalaallit Nunaannut angalanermini nassataani vodkap puuanut toqqorneqarsimavoq. Unnerluutigineqartoq 34.400 koruuninik akiligassinneqarnissaa kiisalu ulluni 45-ni isertitsivimmiitinneqartussanngornissaa unnerluussisup piumasaraa.
• Angut 68-inik ukiulik hashimik 115 gramimik Danmarkimit Kangerlussuarmut nassatamini eqqussisimasutut unnerluutigineqarpoq. Pisoq 2022-mi maajip arfineq-pingajuanni pivoq, 11.550 koruuninillu akiligassinneqarnissaa kiisalu ulluni 30-ni isertitsivimmiitinneqartussanngornissaa, taamaattorli ukiup ataatsip iluani misilinneqarnissaa, assingusumillu pinerluuteqaqqinngikkuni pineqaatissiissut atorunnaarsinneqassasoq unnerluussisup piumasaraa.
• Angut 49-nik ukiulik hashimik 304 gramimik nassatamini 24. marts 2022-mi eqqussisimasutut unnerluutigineqarpoq. Unnerluutigineqartoq 30.400 koruuninik akiligassinneqarnissaa aamma ulluni 40-ni isertitsivimmiitinneqartussanngornissaa, taamaattorli ukiut marluk iluanni misilinneqarnissaa, assingusumillu pinerluuteqaqqinngikkuni pineqaatissiissut atorunnaarsinneqassasoq unnerluussisup piumasaraa.