Helene Broberg Berthelsen aqutsisoqarfimmi pisortanngussaaq
Pitsaaliuinermut Isumaginninnermullu Aqutsisoqarfik nutaamik pisortartaalerpoq, pisortassatullu Helene Broberg Berthelsen toqqarneqarpoq.
Helene Broberg Berthelsen Kommuneqarfik Sermersuumi Meeqqanut Atuarfeqarnermullu pisortatut maanna atorfeqarpoq.
Pitsaaliuinermut isumaginninnermullu aqutsisoqarfimmi pisortatut januaarip aallaqqaataani 2020-mi atorfeqalissaaq. Isumaginninnermut naalakkersuisoqarfik tusagassiutinut taama nalunaaruteqarpoq.
- Pitsaaliuinermut Isumaginninnermullu Aqutsisoqarfiup suliassaanik amerlasuunik pingaaruteqartunillu kivitassaanik ingerlatitseqqiilluni suleqataasussaq aqutsinermi pisortaq taama piginnaasaqarluartigisoq atorfinitsissinnaagatsigu nuannaarutigeqaara. Naalakkersuisut kinguaariit tulliuttut pillugit pitsaasumik ineriartortitsinermik suliaqarnerisa qulakkeerneqarnissaannut Helene Broberg Berthelsenip kommunit suliassaqarfiinut annertuumik ilisimasaqarnera assorsuaq iluaqutaassaaq, Naalakkersuisoqarfimmi pisortaq Julie Præst Wilche oqarpoq.
- Aqutsisoqarfimmi pisortassamik, periutsit pillugit taama annertutigisumik pisinnaasalimmik, kommunimi ingerlatsinermik annertuumik ilisimasalimmik aamma Pitsaaliuinermut Isumaginninnermullu Aqutsisoqarfiup suliassaataasa annertuut piviusunngortinnissaanut piginnaasalimmik nassaarsimanini Pitsaaliuinermut Isumaginninnermullu Aqutsisoqarfiup nuannaarutigaa, tusagassiutinut nalunaarummi allassimavoq.
Naalakkersuisut sumiginnaanerup pitsaaliorneqarnissaa pillugu suliniuteqarneri, meeqqat inuusuttullu aarlerinartorsiortut pillugit suliniutaasa patajaallisaaffiginissaat kiisalu inuttaasut peqqissusaat pillugu pilersaarutip piviusunngortinnissaa suliassat annertuut ilagaat.