Høegh-Dam: Qinersinissaq sioqqullugu sunniiniartarneq nalinginnaalluinnarpoq
Siumumi ataatsimeersuarnissamut taaseqataasinnaallutik aallartitat arlallit siulittaasussamik toqqaanissamut sunnerniarneqarsimasutut Siumut siulersuisuunerinut naammagittaalliuuteqarput. Qinersinissaq sioqqullugu sunniiniarneq nalinginnaalluinnarpoq, qinigassanngortissimasut ilaat oqarpoq.
Siumumi siulittaasussamik qinersinissaq sioqqullugu immikkoortortaqarfinniit taasisinnaatitaallutik aallartitat arlallit siulittaasumik toqqaanissamut sunnerniarneqartarsimapput. Ilaatigut nittartakkami attaveqatigiiffiit atorlugit attavigineqartarlutik avataaniillu kimigiiserfigineqartarsimallutik.
Siulersuisuunerni ilaasortaalersut naammagittaalliuutinik arlalinnik suliaqassapput. Ilaatigut paasissutissat siulersuisunit suli akuerineqartinnagit siammarneqartarsimaneri aamma naammagittaalliuutinut ilaapput. Siulittaasussatut qinigassanngortissimasut ilaata maanna paatsuunganartoqartippaa sooq uippallertoqarnersoq.
- Tupinnartuliaanngilaq siulittaasunngorniunnermi qinersinissaq sioqqullugu qineqqusaarnermik sunniiniartoqartarnera. Taama iliornikkut qinersisissanik qulakkeerinninneq ingerlasarpoq, qineqqusaarnermi sunniiniarneq nalinginnaasoq ingerlasussaavoq, taasisinnaasut taasineri qulakkeerniarlugit, Aki-Matilda Høegh-Dam (S) Sermitsiaq.AG-mut oqarpoq.
- Politik tassaavoq sunniiniarneq. Politikkimi siulittaasunngorniunnermilu sunniiniarnermik ingerlataqarsinnaanngikkutta tamanna ajorluinnarpoq, oqarpoq.
Paasissutissat akuerineqanngitsut avammut nassiunneqarsimasut
Taanna ilisimatitsivoq naammagittaalliuutit suut, partiimi siulittaasutut qinerneqaqqittup Erik Jensenip tusagassiorfinnut oqaluttuarisai pineqarnersut ilisimanagu.
Aki-Matilda Høegh-Damilli paasiuminaatsippaa ataatsimeersuarnermi oqaluuserisassat, ataatsimeersuarnermilu peqataasussat isertuussaanngimmata, avammut nalunaarutigineqarnerisa naammagittaalliutigineqarsimanerat.
- Qinigassanngortittut, taasisinnaasut aallartitat aamma ataatsimeersuarnermilu oqaluuserisassat isertugaataanngillat, aamma isertuunneqartussanngillat. Tamanut ammasuupput. Nipangersaaniartoqarsimappat, uanga isumaga tassaavoq tamanna ajorluinnartoq, nipangersagaasussaanngilagummi, Aki-Matilda Høegh-Dam oqarpoq.
Taassuma erseqqissarpaa paasissutissanik siammaasimaneq naammagittaalliuutillu allat ilisimasaqarfiginagit. Taamalli pisoqarsimanera ajornartorsiutaasariaqanngitsoq, taanna isumaqarpoq.
- Taavami, taama pisoqarsimappat. Partiimi sunniiniarnissarput sunneeqataanissarpullu unitsinniarneqassappat tamanna ajorneruvoq, oqarpoq.