Hollywoodimi filmiliaq suli kalaallinik inuttassarsiorpoq
Filmiliassaq ”The Secret Life Of Walter Mitty” sapaatiuppat Københavnimi piukkunnartussarsiulerpoq. Kalaallit marluk suli pissarsiariniarneqarput
Hollywoodimi filmiliassamut "The Secret Life of Walter Mitty"-mut, Ben Stillerimit ilitsersuisuuffigineqartumut, Nuummi sapaamiummat piukkunnartussarsiortoqarpoq.
Sapaatiuppat kalaallisut tunuliaqutallit soqutiginnittut tamarmik Hollywoodimi filmiliamut ilaalernissamut periarfissinneqaqqissapput.
Aajuku filmiliortut pissarsiariumaneqartut:
- Kalaaleq qulimiguulimmik ingerlatitsisoq: Angut 40-60-inik ukiulik. Ukiui apeqqutaavallaanngillat, inuusuppallaartariaqarnanili. Taanna umiarsuarnut imaaniittunut qulimiguulimmik allakkanik aatsisarpoq Walterilu ilagalugu umiarsualiarluni "Ship to Shore"-mik atilimmut. Filmimi takutitassat immikkoortut marluk septembarimi Islandimi immiunneqassapput.
- Kalaaleq arnaq allakkerivimmi sulisoq: Arnaq 30-60-inik ukiulik. Ukiui apeqqutaavallaanngillat, inuusuppallaartariaqarnanili. Walterip Kalaallit Nunaannut tikereerluni apeqqutai akivai. Filmimi takutitassaq ataaseq septembarimi Islandimi immiunneqassaaq.
Læs også "Hollywood-film søger grønlandske skuespillere"
- Filmi tuluttuujussaaq, tamaattumik naammaginakannersumik tuluttoorsinnaasariaqarpoq. Kalaallisut erseqqissumik oqalussinnaaneq iluaqutaassaaq, Otto Rosing, kalaallinik piukkunnartussarsiornermi ikiuuttussatut Amerikamiunit sulisussarsiarineqarsimasoq, oqarpoq.
Immiussinerit Islandimi ingerlanneqassapput. Isiginnaartitseqataasut saniatigut piukkunnartussarsiornermut peqataasut ilaasa inuttaaqataasussatut Islandimut timmisartuunneqarnissamik neqeroorfigineqarnissaat ilimanarsinnaavoq.
Arnaq septembarip 15-iata missaaniit 19-ianut sulissaaq, angullu septembarip 15-iata missaaniit 28-anut sulissalluni. Amerikami isiginnaartitsisartunut nalinginnaasumik akissarsiaritinneqartut malillugit akissarsiaqartitsisoqassaaq.
Tamanut ammasumik piukkunnartussarsiorneq sapaatiuppat Kalaallit Illuutaanni, Løvstræde 6, 1152 København K-mi nal. 10-mit nal. 17-imut pissaaq. Sapinngisamik amerlanerpaat takunissaannut periarfissaqarumalluni Kalaallit Nunaanni Københavnimilu piukkunnartussarsiornissaq pilersaarutaajuarsimavoq.
”The Secret Life Of Walter Mitty” tuluttut annerusumik maani atuaruk