Housing First angerlarsimaffeqanngitsut ineqalernissaannut iluaqutaassaaq
Angerlarsimaffeqanngitsuuneq pillugu periusissiaq suliniutinik 13-inik imaqartoq Naalakkersuisut saqqummiuppaat. Suliniutit ilaat, Housing First upernaamut aallartissaaq.
Misiligutaasumik suliniut Housing First, innuttaasut angerlarsimaffeqanngitsut angerlarsimaffeqalernissaannut suliniutit siulliit ilagissavaat.
Naalakkersuisut angerlarsimaffeqanngitsuuneq pillugu periusissiaanni suliniutit 13-iusut piffissalersorsimaneranni tamanna takuneqarsinnaavoq.
Periusissiami "Kikkut tamarmik pitsaasumik inuuneqarsinnaatitaapput"-mi nassuiarneqarpoq Housing First, aningaasalerneqareerluni Nuummi upernaaru aallartissasoq. Kommuneqarfik Sermersooq INI A/S-imut inissianik arlalinnik attartussaaq, inissiallu aqqanillit angerlarsimaffeqanngitsunut atortussanngussallutik.
- Innuttaasut ataasiakkaat namminneq ineqarnermik ingerlatsinissaannut ikiorneqarnissaannik inissaqartitsinissap pilersinneqarnissaa, najugaqatigiinnerni siunertarineqarpoq. Aallaaviatigut innuttaasut inissiani qaammatini arfinilinni najugaqarsinnaapput, taamaalillutik inuunermik nalinginnaanerusumik pilersitsinissamut innuttaasut eqqissisimasinnaaniassammata, periusissiami allassimavoq.
Misiligutitut suliniut Nuummi ukiuni pingasuni ingerlassaaq. Tamassumunnga atatillugu Ilisimatusarfik ukiuni pingasuni suleqatigineqassaaq, innuttaasut angerlarsimaffeqalernissaannut sunik pisariaqartitsinersut pillugit misissuisussanngortillugu.
Innuttaasut 1 procentii angerlarsimaffeqanngillat
Nunatsinni angerlarsimaffeqanngitsunik pisortatigoortumik kisitsinerup takutippaa angerlarsimaffeqanngitsut 2022-mi 491-iusut.
- Kalaallit Nunaanni angerlarsimaffeqanngitsut amerlassusaat nunanut allanut naleqqiullugu annertoqaaq. Tamanna Naalakkersuisut uagullu inuiaqatigiittut akuersaarsinnaanngilarput, isumaginninnermut Naalakkersuisoq, Jess Svane, S, angerlarsimaffeqanngitsuuneq pillugu periusissiap saqqummersinneqarnerani oqaaseqarpoq.
Periusissiap siunertaraa angerlarsimaffeqanngitsut ikilisinnissaat. Suliniutinut ilaassaaq angerlarsimaffeqanngitsut kisitsisinngorlugit malinnaaffigineqarnissaat, suliniutit iluaqutaanersut takuneqarsinnaalluaqqullugit.
Angerlarsimaffeqanngitsut 2024-mi naatsorsorneqaqqissapput.
Ornigunnerulluni suliniutit
Periusissiami qitiulluinnartut ilagaat innuttaasut atugarliortut ornillugit suliniuteqarnerulernissaq. Kommunit tassani aqqusinermi sulisussanik pilersitsissapput, innuttaasut angerlarsimaffeqarunnaarnissap pinaveersaartinnissaannik, toqqaannartumillu angerlarsimaffeqanngitsunik attaveqarnermik suliaqartussanik.
- Angerlarsimaffeqanngitsut amerlassusaat qaffasissoq ilaatigut pissuteqarsinnaavoq, innuttaasut ilaqutariillu atugarliortut annerusumik ikiorneqarnissamik pisariaqartitsisut, kiisalu oqartussat tungaanniit ullumikkumiit neqeroorutigineqartumit eqeersimaarnerusumik aamma ornigunnerusumik suliniuteqarnissaq.
- Angerlarsimaffeqanngitsuuneq pillugu periusissiap ajornartorsiutit taakkorpiaat sillimaffiginiarpai, politikkikkullu siammasissumik isumaqataaffiusunik aaqqiissutissat pillugit oqallinnissamut aallarniilluni, Jess Svane oqarpoq.