HOW TO SWALLOW A WHALE

Oqartussaaqataasumik nungusaataanngitsumillu pisuussutitta atorneqarnissaat

All.: TNT Nuuk, E+E Arkitekter aamma Hausenberg

Silap kissarnerulernera pissutigalugu ukiuni makkunani Kalaallit Nunaat nutaarluinnarnik periarfissaqalerpoq. Sermeq aakkiartormat aatsitassat nunap iluaniittut uuliaqarfiillu akilersinnaasumik qallorneqarsinnaalissapput, nunallu kujasinnerusuani nuna naggorissarneqarsinnaalissaaq ilaatigullu naatsiianik naatitsilluni savaateqarlunilu.

Kalaallit Nunaat amerlanerusunik isertitaqarnissaminik maannakkorpiaq pisariaqartitsivoq. Nunap sorsuutigai ilinniagaqartitsineq appasissoq, pisortat allaffissornerujussuat, isumaginninnikkut ajornartorsiutit aningaasaqarnikkullu Danmarkimik isumalluuteqarneq. Kalaallit Atugarissaarnermut Ataatsimiititaliarsuat 2011-imi inerniliivoq »uninngaannarnissaq periarfissaanngitsoq«. Periarfissalli nutaat imaasiallaannaq atorluarniarneqarsinnaanngillat. Suliassat kivinneqassapput nunarsuarmi qeqertat annersaanni kalaallinit 60.000-iinnarnit. Qeqertaq aqqusineqanngitsoq issittup silaanik sualuttumik silalik. Qeqertaq inuttalik kinguaariit marluinnaat ingerlaneranni piniartuunermiit nunami pigissaartumi nutaaliaasumik inuulersunik.

Nunat nunanilu tamalaani ingerlatsiviit ukiuni makkunani Kalaallit Nunaata ataani pisuussutit kajungereqaat. Periarfissarpassuit nutaat kalaallini inuiaqatigiinni kikkunnut tamanut iluaqutaassappata kalaallit politikerit kalaallillu innuttaasut immikkut ittumik iliuuseqartariaqarput. Isumaqarpugut atortussaq pingaarutilik tassaasoq Kalaallit Nunaata siunissaa pillugu atituumik itisuumillu oqallinnissaq. Kalaallit naleqartitaasa nassuiarneqarnissaat atorfissaqartinneqarpoq, Kalaallit Nunaannik pitsaanerusumik siunniussamik nukittuumik pilersitsiniarluni sulinermi politikerit innuttaasullu atugassaannik.

HOW TO SWALLOW A WHALE Kalaallit Nunaata siunissaa pillugu oqallinnermi apeqqutinik qulinik ilapittuuteqarpoq.

Nuna piitsoq Bhutan-itut ittoq takornariaqarnermik killilersuiniarami, imaanngilaq taamaasiortoq niuernermik ilisimasaqannginnami. Aammami aalajangerneq sualuttuuvoq, taperserneqartoq ineriartornissamik takorluukkamik nukittuumik, tassa nunap siuariartornera taamaallaat aningaasanik nalilersorneqassanngitsoq, aammattaarlli innuttaasut pillluarnerannik – Gross National Happiness. Takornariaqarnerup killilersorneqarnera isigineqarsinnaavoq takussutissatut Bhutan avataanit isaaffigerujussuarneqarumanngitsoq; ineriartornermi nuna imminut peqataatikkusuttoq. Piffissaq sivikinnerusoq isigalugu tamanna isertitassanik naleqarpoq, immaqali piffissaq ungasinnerusoq isigalugu nunap tamanna iluaqutissarsiffigissavaa?

Kalaallit Nunaata ullumikkut misigaa periarfissarpassuit ammasut: Aalisarnerup pitsanngorsarnera, Kujataani nunalerineq, aatsitassat, urani aatsitassallu qaqutigoortut, immaqalu nunap ataani uulia. Tamakkua saniatigut takornariaqarneq, erngup nukinga immaqalu siunissami imeqarfissamaatit. Qanoq isillutik kalaallit piginnaaneqalissappat, taamaasilluni pisuussutit namminneq atorsinnaalerlugit? Pisuussutit suut Kalaallit Nunaata iluaqutiginiassavai? Isumassarsiatsialaat ingerlanneqarsinnaanerat qanoq isilluni qulakkeerneqassava? Avataanit aningaasatigut soqutigisalinnut Kalaallit Nunaat sunik piumasaqaateqassava? Kalaallit namminneq qanoq inissisimassappat? Uuttortaatit suut atorlugit Kalaallit Nunaata iluatsitsineq uuttortassavaa?

How to cultivate Greenland pisuussutit suulluunniit sukkanerpaamik atornissaannik apeqqutaanngilaq imaasiallaannaq akissutissalik. Pisuussutit pioreersut nutaallu tulleriiaarnissaannut Kalaallillu Nunaannut eqqortumik atorneqarnissaannut apeqqutaavoq akiuminaatsoq. Periutsit piffissamut sivikitsumut ajornartorsiutinik pinartunik ikiorsiisut, piffissamulli sivisuumut inuiaqatigiinnik nungusaanngitsunut ineriartorneq akornusernagu. Kalaallit kissaatigaat nunap pisuussutaasa atorneqarnerat pissasoq inuiaqatigiinni aningasarsiornikkut isumaginninnikkullu ajornartorsiutit aaqqinneqarnissaat ilutigalugu, aammalu ineriartorneq kalaallit tunngavii tunngavigalugit pissasoq. Ataqatigiinnissarli tamanna qularnanngitsuunngilaq, taamaallaallu pisinnaalluni eqqortunik aalajangiigutta.

Kalaallit Nunaata atorfissaqartippaa eqqarsarluarnissaq, silatuumik toqqaanissaq piareersarluarsimanissarlu. Allanngortitserusukkutta ungasissuseq qaangertariaqarparput, immitsinnullu ungasissorujussuugaluarluta sulilerluta oqaloqatigiilerlutalu. Taamaallaat suliniutitta ataqatigiissaarnerisigut ataqatigiissuseq nukiillu, ingerlaqqinnissamut pisariaqartut, pissarsiarisinnaavagut. Oqallinneq aallarteruttorpoq. Politikerini, tusagassiorfinni, innuttaasuni, inuussutissarsiortuni, ilinniagaqartitsivinni kattuffinnilu.

Kalaallit Nunaat nunarsuup ilagaa, uagulli kalaaliusutut nammineq aqutsisariaqarpugut siunissarpullu nammineq aalajangerlugu. Taamaasiunngikkutta allat sinnerluta aalajangiissapput. Illit qanoq takorluugaqarpit?