IA: Akit assigiinnginnerat aamma nammaqatigiinneruvoq
Atukkat tamanut assigiit pilersissinnaanngilagut, IA-p ataatsimeersuarnerat ammarlugu siulittaasoq Josef Motzfeldt erseqqissaavoq.
-IA akit assigiikkunnaarneranut peqataavoq amerlanerpaanut iluaqutaammat, aningaasarsiornerlu ikkarlummiit kaanngartariaqarmat, Josef Motzfeldt oqarpoq IA-p Maniitsumi ataatsimeersuarnera ullaa-tungaa ammaramiuk.
Akit assigiikkunnaarnerat IA-p ataatsimeersuarnerani oqaluuserisassanut ilaavoq, Upernavimmi immikkoortortaqarfiup oqaluuserisassanngortimmagu. Upernavimmiut taama aaqqissuussineq upissuppaat, isumaqarlutik isorliunerusuni inuppassuit tamatuma kingunerisaanik atugarliulerlismasut.
- IA-p nammaqatigiinnissamik anguniagaanik unioqqutitsineruvoq, Upernavimmi immikkoortortaqarfik allappoq.
Siulersuisuuunerilli, Josef Motzfeldtimik siuttoqarlutik, isumaat naapertorlugu akit assigiikkunnaarnerat nammaqatigiinnermut akerliunngilaq.
Akerlianik innuttaasut pitsaanerusunik atugaqalerniarlutik anguniagaqarnissaannut aallaaviuvoq - nammineq, allanik isumalluuteqarani, namminersorneq siunertaralugu.
-Ataasiakkaat namminneq isumassarsiorsinnaanerat suleqatigiissinnaanerallu apeqqutaaginnarpoq. Atugarissaarneq allanit akilerneqartoq tulluusimaarutissanngilaq. Inuttut atugarissaarneq ilinniagaqarnermiippoq, inuussutigisinnaasamik suliffeqarnermiippoq imaluunniit namminersorluni ingerlanermiippoq, Josef Motzfeldt oqarpoq.
Siulersuisuunerit nalunaarutaanni erserpoq inuiaqatigiit immikkoortiternagit ataatsimulli isigalugit naliliisariaqartoq.
- Siulersuisuunerit arajutsisimannngilaat nunaqarfiit illoqarfiillu ilaanni suliffissaaleqiffiusuni atugarliorneq qanoq angitigisoq. Siulersuisuunerni aamma ujartortuarparput inuttaasut qanimut qinigaasa, kommunalbestyrelsit aqutsisullu, atugarissaarnerunermut aqqutissiuussinissamut sassartaarnerunissaat.