IA: Akulerutissaagut
Qimaasunut politikki sammisaqarfiit ilagaat Kalaallit Nunaata Folketingip sulinerani akuleruffigisassaa, IA-p folketingimut ilaasortaatitaa nunanullu allanut oqaaseqartartua oqarput.
Juliane Henningsen aamma Josef Motzfeldt, IA-meersut, isumaqarput qimaasunut politikki sammisaqarfiit ilagerpiaraat kalaallit politikeriisa akuleruffigisassaat, aamma Folketingimi.
– Qallunaat tamanna nunap iluani politikkerigaat, kalaallit savalimmiormiullu akuleruffigisassaanngisaannik oqarneq piumasaarsorneruvoq, taakkua marluullutik ataatsimut tusagassiorfinnut nalunaarumminni allapput.
Politikerit taakkua marluk allappoq, qimaasunut politikki aamma nunasisunut politikki sammisaqarfiit ilagaat qallunaat naalakkersuisuisa, killilimmillu Folketingip, naalagaaffik sinnerlugu ingerlataat.
Namminersornermut ataatsimiititaliarsuup apeqqut tamanna oqaluuserisimavaa inerniliillunilu suliassaqarfiit Namminersortunngortussanut tunniunneqarsinnaasoq/tunniunneqassasoq. Qimaasullu pillugit oqallinneq juullip siornatigut Kalaallit Nunaanni ingerlanneqarsimavoq, Juliane Henningsen aamma Josef Motzfeldt tikkuaapput.
– Juulli sioqqullugu pikkunalaartumik oqallisigaarput qimaasut imaluunniit nunasisut allat nunami maani qimaasutut akuerineqassanersut imaluunniit najugaqarsinnaanersut. Suliassamilu tamarmi aamma qitiuvoq inoqatinut ajorsaatillit eqqarsaatigalugit qanoq inuttut isiginnittoqassanersoq. Apeqqutini tunngaviusuni nunarsuarmiioqatigiinnullu atasuni isummernissavut nunatsinni nammineq politikkitsinnut killilersinnaanngilarput - nunap iluanut nunarsuarmullu tamarmut apeqqutaavoq taamaallaat isumatuumik isumagineqarsinnaasoq nunat tamalaat suleqatigiinnerisigut, kikkut tamarmik peqataaffigisaannik, Julane Henningsen aamma Josef Motzfeldt oqarput.