IA: Demokraatit muminnerat ajorpoq
IA-p inuusuttaasa Demokraatit namminersorneq pillugu isummaminnik allanngortitsinerat isornartorsiorpaat. Kalaallit ataatsimoornerannik ajoqusiivoq nutaaliornissamullu akerliulluni, IA'p Inuusuttai allapput.
Inuusuttut Ataqatigiit isumaqarput kalaallit qallunaallu suleqatigiinneranni maannamut angusaq aatsaat taama pitsatigisoq isummanullu qangarnitsanut pituttorsimasuunani nutaaliortuusoq.
- Demokraatit itisilerlugu nassuiartariaqarpaat isumatigiissummut naaggaarniarnerminnut suut tunngaviginerlugit taavalu sooq tamakku piffissaagallartillugu iluminni aaqqinniarsimannginnerlugit, folketingimi ilaasortaq Juliane Henningsen IA'p Inuusuttai sinnerlugit allappoq.
- Inuiattut akuerisaaneq aningaasanngorlugu nalilerneqarsinnaanngilaq, Demokraatit tamanna paatsoorujussuarsimavaat. Inuiattut akuerisaanissap ukiorpassuarni anguniarneqarsimaneranut tamanna nikassaataavoq annertooq, Juliane Henningsen allappoq, nangillunilu:
- Nutaamik alloriarnissarput akisussaaffinnik nutaanik tigusinermi nammineq aningaasalersuillutalu aaliangiisinnaasussaanerput inuiannut namminersulerusuttunut naapertuuttuuvoq, Demokraatillu kajumissaarpaat sukataaqatigeqqullutik.
- Namminersorneq pinngitsoorani aggerpoq, ataatsimoorlutalu nukittunerussasugut qularnanngilaq.