IA: Kinap Kuannersuarnut appakaannissaa Naalakkersuisut akueraat?
China National Nuclear Corporationip Shenghe Resources Holding Co Ltd-imik suleqateqalersimanera Inuit Ataqatigiinnit akerlilerneqarpoq
Greenland Minerals Ltd-imi pinginneqataasut ilisimaneqartut annersaata, Kinamiut suliffeqarfiutaata Shenghe Resources Holding Co Ltd-ip China National Nuclear Corporationimik suleqateqalersimanera Inuit Ataqatigiinnit uparuarneqarpoq.
CNNC´-ip suliffeqarfiutaata, Hua Sheng-ip, Shenghe Resources Holding Co Ltd-imik suleqatigineqalersup Shenghe-millu 45 procent-imik pigineqartup aatsitassat qaqutigoortut Kuannersuarni piiaasussaavoq.
- Inuit Ataqatigiinniit paaserusupparput GME A/S tassanngalu piginnittut Naalakkersuisunit isumaqatigiissuteqarfigineqareersimanersut, imaluunniit pilersaarutinik piareeqqasunik akuersereersimanersut uranimik thoriumimillu akulinnik aatsitassanik piianermut taakkulu tuniniarneqarnissaannut tunngasunik imalinnik. Suli VVM naammassillugu suliarineqanngitsoq akuerineqanngitsorlu, Inuit Ataqatigiit Inatsisartuni gruppia tusagassiutinut allapput.
- Erik Jensen Narsaliarnerpa innuttaasut akuutinneqarnissaat ilumoorullugu, aammalu uranimik thoriumimillu akulinnik aatitassanik piiaasoqassappat tamatuma qanoq kinguneqarnissaanik paasititsiniaanissamik ilumoorussilluni? Imaluunniit Naalakkersuisut aalajangereerpat Kuannersuarmi aatsitassanik aamma uranimik thoriumimillu akulinnik piiaanissamut naalagaaffik Kina appakaatsitissallugu?