IA: Kommune Kujallermi kammalaatigiiaanneq
IA nunatta kujataani immikkoortortaqarfiata kommunerujussuup pisortassasa atorfinitsinneqarnerat kamaatigaa. Nunap immikkoortortaani Siumukkunnit aqunneqartumi pissaanermik atornerluineq ilaquttanillu atorfinitsitsisarneq pillugu pasineqarpoq.
Qinnuteqarnissamut piffissaliussaq sivikitsoq kinguneeranngualu atorfinitsitsinerit Kommune Kujalleq-mi pisortassanut atorfinitsitsinissami periusseq ilisarnaataalluarpoq, tamakkulu -siumukkunnit Atassummit Demokraatinillu tapersersorneqarlutik aalajangerneqarput. Narsami, Qaqortumi Nanortalimmilu IA-p immikkoortortaqarfii kissaammersimasut taamak isumaqarput. IA naapertorlugu atorfiit inuttassarsiukkat internetimi quppernerni marlunni maajip 26-iani saqqummiunneqarput, maajillu 29-iani naqitanngorlugit saqqummiunneqarlutik. IA isumaqarpoq, pisortatut atorfiit 11-it tamarmik inunnit maannakkut ingerlatsivinneersunit inuttalersorneqarnerataammalu ullup piffissaliussap juunip 9-ata qaangiunnerata aqaguani atorfinitsinneqarnerat eqqarsariarnartoqartoq.
– Eqqarsaatigeriigaarpasippoq. Kikkulluunniit nalunngilaat tusagassiorfiit naqitat saqqummerneranniit ullut 14-it qaangiukkaangata aatsaat nunatsinnut tamanut apuuttartoq. Qinnuteqarnissamut piffissaliussap sivikippallaartup saniatigut akisussaaffiit suuneri suliassalluunniit suuneri allaaserineqarsimanngillat, kisianni Kalaallit Nunaata Kujataanik immikkut ilisimasaqarluarnissaq pillugu piumasaqaatitaqarluni, IA-p immikkoortortaqarfii tusagassiorfinnut ataatsimoortumik nalunaarumminni allapput.
Narsami kommunaldirektøriusimasumut (Ole Mølgaard-Motzfeldtimut, aaqq.) attaveqarnermut atorfik nutaaq aamma atorunnaarsinneqarsimasoq IA-mi immikkoortortaqarfiit tusarsimavaat.
– Vupti, taamaalilluni siumukkunnut kammalaat direktøritut atorfeqarsinnaaleratarpoq, IA allappoq. Peqatigitillugu taavaat maanna piffissap taamaalinerani kommunerujussuup iluani avammullu attaveqartarneq pillugu periusissamik nalunaaruteqartoqaraniluunniit aalajangiisoqarsimanngitsoq, soorluli atorfiup imarisassai pillugit nassuiaasiortoqarsimanngitsoq.
– Odensep Kommuneata (187.000-inik innuttaqartoq, aaqq.) assersuutigalugu paasissutissiisarnermut pisortaq ataaseq naammagaa, Kommune Kujallermili (7.800-t inulaarlugit amerlassusillit, aaqq.) kommunikationsDIREKTØR-imik atorfinitsinniarneqarpoq. Innuttaasullu akileraartartut akiligassaraat, Narsami, Qaqortumi Nanortalimmilu IA erseqqissaavoq.
– Kommunerujussuup pilersinneqarneratigut Kommune Kujallermi siumut isigisumi nutaaliornermillu eqqarsartumi pilersitsiviusumik sulinissamut aallarniutaasussaagaluarpoq. Taarsiulluguli ilaquttanik atorfinitsitsisarneq kammalaatigiiaannerlu pilerput, tamalu Kommune Kujallermi sulisut piukkunnaateqarnerpaat atorfinitsinneqarnissaannit salliutillugu kammalaatit eqqortut atofinnut pitsaasunut inissinnissaat pingaarnerutinneqartungalluni. Pineqartoq manna Elan Egedep Kalaallit Nunaanni pissaanermik atornerluisarneq pillugu allaaserisaanut immikkoortututtaartutut nutaatut ilaasinnaarpasippoq, IA tusagassiorfinnut nalunaarummini naggasiivoq.