Kommunep avinneqarnissaa
IA: Kommunep avinnissaanut piffissaanngilaq
Qaasuitsup Kommuniata avinneqarnissaa pillugu siunnersuut Inuit Ataqatigiit tapersernianngilaat
- Uggornarpoq kommunalbestyrelsemi ilaasortaqateqaratta tunniutiinnareersimasunik. Aporfiit akiorniarlugit sulisimasuugutta angusaqarnerusimassagaluarpugut nukivut kommunep avinneqarnissaanut atornagut.
Inuit Ataqatigiit Qaasuitsup Kommuniani kommunalbestyrelsemi gruppeanni siulittaasoq Ane Hansen Sermitsiaq.AG-mut oqarpoq kommunalbestyrelsep ileqquusumik ataatsimiinnissaa ataasinngornermi ullaap tungaa aallartinngilaartoq.
IA uppernarsaatinik piumavoq
Siumup gruppeani ilaasortat arfineq marluk ataatsimoorlutik siunnersuuteqarput Qaasuitsup Kommuniata avinneqarnissaanik. Siunnersuuteqartut isumaqarput kommunerujussuanngornerup kingorna Qaasuitsup Kommuniani innuttaasut sullinneqarnerat ajorseriarsimasoq aammalu innuttaasut oqartussaaqataanerat nukilaannerulersimasoq.
- Uagut isumaqarpugut kommunerujussuanngornerup pitsaaqutaanik sanngeequtaanillu misissuisussatut qinigaaffik kingulleq pilersinneqartut suliartik nangittariaqaraat. Tassami oqariartuutigineqartut ilumoornermut takussutissaqartariaqarpoq, Ane Hansen oqarpoq.
Suleqatigiit pineqartut partiinit tamani soqutigisaqatigiinnillu inuttalersugaapput.
Aporfiit assigiit
Ane Hansen pakatsisimanerarpoq kommunep avinneqarnissaa kommunalbestyrelsemi ilaasortanit siunnersuutigineqarmat kommunerujussuanngornerup kingorna qinigaaffik ataaseq ingerlariiginnartoq.
- Qaasuitsup Kommuniata kommunerujussuanngornerup kingorna aqqusaagai kommunet allat aqqusaagaannut eqqaanartorujussuupput. Innuttaasut atugaannik pitsanngorsaaniarluta sulinerput angusaqarfiunerusimassagaluarpoq ataatsimiititaliat siulittaasui tamatumunnga pimoorussinerusuuppata, Ane Hansen oqarpoq.