IA: Kommunini qanimut oqartussaaqataaneq pingaaqaaq
Inuit Ataqatigiit kommuniusimasut kommunalbestyrelseni minnerpaamik ataatsimik ilaa-sortaatitaqartarnissaannik isuma qimanngilaat
Ullumi siusinnersukkut Demokratit nalunaarutigaat, Kalaallit Nunaanni qinersivik ataaseq siunissami kommuninut qinersisoqartillugu atuuttariaqartoq.
Siunnersuut taanna upernaakkut ataatsimiinnissami saqqummiunneqarnissaa pillugu tusarniaassutigineqarpoq. Siunnersuutip taassuma kinguneranik assersuutigalugu Qaasuitsup Kommunia sumiiffimmik sinniisit arfineq-pingasut qinerneqarnissaat Demokraatit politikkikkut oqaaseqartartuata Anda Uldumip mamaaga.
Illoqarfiit kommuniusimasut pinngitsooratik minnerpaamik qinikkamik ataatsimik aallartitaqartussaanerat pisariaqarpoq, Inatsisartunut ilaasortaq Juliane Henningsen, Inuit Ataqatigiit oqarpoq.
- Kommunit kattussorneqarput, kommunini qinikkat kiisalu nunaqarfinni aqutsisunut ilaasortat ikilisinneqarput. Sumiiffinni kommuniusimasuni toqqaannartumik inuit sullinneqarnerat allannguuteqarpoq, nunap immikkoortuini qitiusoqarfinnik sisamanik pilersitsinikkut kommunit anginerusut pilersinneqarmata.
- Inatsisitigut allannguinngikkutta kommunini pineqartumi qanoq qinigaatigineq aallaavigalugu illoqarfiit ilaanni qinikkamik aallaartitaqanngitsuuissinnaaneq periarfissaa-juassaaq. Tamanna oqartussaaqataanermik annertuumik annaasaqaataasussatut isigineqartariaqartoq isumaqarpugut. Ilisimavarpummi inuiaqatigiit nunatsinni siammasissumik nunasiortorsimavugut.
- Ilaatigullu illoqarfiit kommuniusimasut avinngarusimallutik inissisimanerat aallaavigalugu qinikkatut qanimut malinnaaniarnermut aporfiulersinnaasarpoq. Maanna aaqqiissutissatut eqqartorneqaraluarput piffinni siunnersuisooqatigiit assigiinngitsut, taakkuli toqqaannartumik oqartussaaqataalluni kommunalbestyrelsemi ilaasortaaneq taarsersinnaanngisaannassavaat, Juliane Henningsen oqarpoq.
Equngasoqarpoq
- Illoqarfiit kommuniusimasut pinngitsooratik minnerpaamik qinikkamik ataatsimik aallartitaqartussaanerat pisariaqarpoq, tamanna oqartussaaqataanerup millisarneqannginnissaannik qulakkeerinniinnarani, aamma sumiiffinni ataasiakkaani ilisimasaqassutsip pingaaruteqarneranik inuillu qinikkanut qanimut attaveqarsinnaanerannut iluaqusiisussaavoq, Juliane Henningsen oqarpoq.
Taanna naapertorlugu kikkut tamat ilisimavaat illoqarfiit inuttussusertik pissutigalugu sumiiffinni qinersinerni isertitaqarnerpaajusinnaasut.
- Nunarsuarmi qeqertat annersaanni inuiaqatigiit siammasissumik nunasiortorsimanerput aamma pisortat ingerlatseriaasiatigut nunami pissutsinut naleqqussakkamik aaqqiissuteqarnissaq pisariaqarpoq. Nunatsinni inuit tamarmik oqartussaaqataasutut misigalutik inooqataanissaat, isummersoqataanissaat tusaaneqartutullu misigisimanissaat peqataatitsinikkut anguneqartariaqartoq isumaqarpugut, Inuit Ataqatigiinneersoq oqarpoq.
- Nunatsinni angallannikkut periarfissat sumiiffiit ilaanni ajornakusooqaat aningaasarpassuarnillu naleqarsinnaasarlutik, taamaammat allatut aaqqiissuteqarnissaq avaqqukkuminaappoq. Tamatumanilu innuttaasut qanimut oqartussaaqataaneq nukittorsaqqummassuk tusaaniartariaqarparput, Juliane Henningsen oqarpoq.