IA: Kommunit aveqqinneqassappata akisussaassuseqannginneruvoq
Naleqqap Nunattalu Qitornaasa siunnersuutigaat kommunit mikinerusunngorlugit avinneqassasut, tamanna illoqarfiit pingaarnersaata kommuniani IA sinnerlugu borgmesterip Charlotte Ludvigsenip ”akisussaassuseqannginnertut” taavaa.
Kommunit ukiut aqqaneq-marluk matuma siornatigut 18-iusut sisamanut ikilisinneqarput, ullumikkullu tallimaallutik, Naleraq Nunattalu Qitornai aalajangiisinnaasuuppata kommunit aaqqiissuteqqinneqassagaluarput, sumiiffinni ataasiakkaani innuttaasut aalajangingassanut oqartussaaqataalersillugit.
Pele Broberg Naleqqameersoq assersuutigalugu isumaqarpoq, kommunit inuttunerpaartaat Sermersooq kangiani kitaanilu kommuninut marlunnut avinneqartariaqartut.
Siunnersuut Kommuneqarfik Sermersuumi IA sinnerlugu borgmesteriusumit Charlotte Ludvigsenimit sakkortuumik akerlilerneqarpoq.
Pissaaneqarniunneq
- Aaqqissuusseqqinnerit angisuut iluatsissagunik piffissaq sivisooq atortariaqarpoq. Aamma una taamaappoq. Kommunitsinni allaffissornerup aaqqissuuteqqinniarneqarnera
akisussaassuseqanngippallaarpoq, takutiinnarpaalu pissaaneqarniuunneq ilaatigut takkuttartoq Naalakkersuisuni atuuttoq. Kommunimi allaffissornikkut sorpassuarnik pitsanngorsagassaqarpoq, kisianni eqqarsarluarsimanani innuttaasunillu peqataatitsinikuunani ataasiarlugit aaqqissuuteqqinniarneratigut pitsanngorsarneqarsinnaanngillat, borgmesteri oqarpoq.
Charlotte Ludvigsenip oqaatigaa, ajukkani aalajangeqqataanissaq, qanilaarneq isumannaatsumillu ingerlatsineq pilersinniarlugit sumiiffippassuarni pitsaasunik suliniuterpassuaqartoq. Peqatigitillugu aalajaatsuuneq pingaaruteqarnerarpaa.
- Kommunit nutaamik aaqqissuussaaqinniarpata allanngujaassuseq aserorsarneqassaaq, naggataagullu kiffartuussinerlunnikkut, suliffinnik annaasaqarnikkut allaffissornerup tukallineratigut innuttaasut eqqugaasussaapput, borgmesteri ukiuq aqqaneq-marluk matuma siornatigut kommuninik aaqqissuusseqqissimanerup nalilersuiffigineqarnissaanut piffissanngortoq isumaqarfigalugu oqarpoq.
- Pitsaanerusumik suliarineqarsinnaasut suli amerlaqaat. Najukkani qanimut oqartussaaqataaneq suli nukittorsassavarput, innuttaasullu tamarmik takuneqartutut, tusaaneqartutut pimoorunneqartutullu misiginissaat qulakkeertussaavarput, taanna erseqqissaavoq.
Aningaasat uuttuutitut
Parteeqataa Juaaka Lybertht Kommuneqarfik Sermersuumi kommunimut qinigassanngortittoq, najugaqarfinni, nunaqarfinni illoqarfinnilu mikinerusuni aningaasaqarnermik qitiutitsilluni saqqimmiussaqarpoq.
- Aningaasat uuttuutigissagaanni akissutissaa erseqqippoq, tassa: aap, nunaqarfinnut illoqarfinnullu minnernut kommunerujussuarmeeqataaneq iluaqutaavoq, Kommuneqarfik Sermersooq eqqarsaatigissagaanni, Juaaka Lyberth kommunit mannakkut iluaqutissartai pillugit oqarpoq.
Taassuma oqaatigaa, 2019-imi naatsorsuisimaneq malillugu akileraarutitigut isertitanik agguaqatigiissitsisarneq kommunerujussuarmi najugaqarfinnut mikinerusunut iluaqutaasartoq.
- Assersuutigigutsigu Tasiilami 2.949-nik inulimmi, agguaqatigiissillugu, kommunip inummut ataatsimut aningasartuutigisarpai 125.490 koruunit. Inummit ataatsimit
isertitsissutigineqartarput 87.254 koruunit. Nuummiillu Tasiilamut ukiumut aningaasaliissutigineqartarput 124.779.350 koruunit, taanna erseqqissaavoq.
- Taamaattumik Kommuneqarfik Sermersuumi kommunerujussuaqatigiinneq nunaqarfinnut illoqarfinnullu allanut aningaasatigut iluaqutaasorujussuuvoq. Tamanna IA-mi tulluusimaarutigeqaarput, pissusissamisoorluinnartutut isigalugu. Tassami IA-mi politikkeraarput pissaqarnerusut pissakinnerusunik ikiusarnissaat, Juaaka Lyberth innuttaasut oqartussaaqataanerat pingaartillugu illoqarfinni tamani najukkani
siunnersuisoqatigiinnik pilersitsisoqarsimasoq erseqqissaalluni oqarpoq.